മാന്നാര്‍: ഫേസ്ബുക്കിലൂടെ പരിചയപ്പെട്ട പെണ്‍കുട്ടിയെ പ്രണയം നടിച്ച്‌ ലൈംഗികമായി ചൂഷണം ചെയ്ത കേസിൽ യുവാവ് അറസ്റ്റില്‍. കൊല്ലം കരുനാഗപ്പള്ളി ആദിനാട് അയ്യങ്കോയിക്കല്‍ പുത്തന്‍വീട്ടില്‍ സുജിത് (30) ആണ് പോക്സോ നിയമപ്രകാരം അറസ്റ്റിലായത്.
ഫേസ്ബുക്കിലൂടെ പരിചയപ്പെട്ട പത്താം ക്ലാസ് വിദ്യാര്‍ഥിനിയെയാണ് ഇയാള്‍ ചൂഷണം ചെയ്തത്. പെണ്‍കുട്ടിയുമായി അടുത്ത ബന്ധം ഉണ്ടാക്കിയ ശേഷം നഗ്ന ഫോട്ടോകളും വീഡിയോകളും വാങ്ങുകയും ഇത് പുറത്തുവിടുമെന്ന് ഭീഷണിപ്പെടുത്തി ലൈംഗിക ചൂഷണത്തിന് ഇരയാക്കുകയായിരുന്നു. കരുനാഗപ്പള്ളി വലിയഴീക്കല്‍ ഭാഗത്തു നിന്നാണ് മാന്നാര്‍ എസ്.എച്ച്‌.ഒ. ജി. സുരേഷ് കുമാറിന്‍റെ നേതൃത്വത്തില്‍ പ്രതിയെ കസ്റ്റഡിയിലെടുത്തത്. കോടതിയില്‍ ഹാജരാക്കിയ പ്രതിയെ ആലപ്പുഴ ജില്ല ജയിലിലേക്ക് റിമാന്‍ഡ് ചെയ്തു.
ഓണ്‍ലൈന്‍ ക്ലാസ്സുകള്‍ക്കായി കുട്ടികള്‍ക്ക് മൊബൈല്‍ ഫോണും ഇന്‍റര്‍നെറ്റും ലഭ്യമാക്കുമ്പോള്‍ ഇത്തരം ചതിക്കുഴികളില്‍ വീഴാതെ സംരക്ഷിക്കാന്‍ രക്ഷകര്‍ത്താക്കള്‍ ജാഗ്രത കാട്ടണമെന്ന് പൊലീസ് നിര്‍ദേശിച്ചു.
