ജനിതക മാറ്റം വരുത്തിയ പന്നിയുടെ ഹൃദയം മനുഷ്യനില് വച്ചുപിടിപ്പിച്ചു. അമേരിക്കയിലെ മേരിലാന്ഡ് മെഡിക്കല് യൂണിവേഴ്സിറ്റിയിലാണ് ശസ്ത്രക്രിയ നടന്നത്. മേരിലാന്ഡ് സ്വദേശിയായ ഡേവിഡ് ബെനറ്റ് എന്ന 57 കാരനിലാണ് ശസ്ത്രക്രിയ നടന്നത്. ഹൃദ്രോഗിയായ ബെനറ്റ് ശസ്ത്രക്രിയയ്ക്ക് ശേഷം സുഖം പ്രാപിച്ചു വരുന്നതായി ആശുപത്രി അധികൃതര് അറിയിച്ചു.
ഏഴ് മണിക്കൂര് നീണ്ട ശസ്ത്രക്രിയ മൂന്ന് ദിവസം മുന്പാണ് നടന്നത്. ബാള്ട്ടിമോറിലെ മേരിലാന്ഡ് മെഡിക്കല് സെന്ററാണ് ശസ്ത്രക്രിയ വിജയകരമായി പൂര്ത്തിയാക്കിയത്. അവയവം വച്ചുപിടിപ്പിക്കുന്നതില് ക്ഷാമം പരിഹരിക്കാനുള്ള പുതിയ ചുവടുവയ്പ്പാണിതെന്ന് ഡോക്ടര്മാര് പറഞ്ഞു.
‘ഹൃദയം സാധാരണപോലെ പ്രവര്ത്തിക്കുന്നു. ഞങ്ങള് ആവേശഭരിതരാണ്. ഇത് മുന്പൊരിക്കലും ചെയ്യാത്ത കാര്യമാണ്’- ഓപ്പറേഷന് നേതൃത്വം നല്കിയ മെഡിക്കല് സെന്ററിലെ കാര്ഡിയാക് ട്രാന്സ്പ്ലാന്റ് പ്രോഗ്രാം ഡയറക്ടര് ഡോ. ബാര്ട്ട്ലി ഗ്രിഫിത്ത് പറഞ്ഞു.
‘ഒന്നുകില് മരിക്കും. അല്ലെങ്കില് ഈ ശസ്ത്രക്രിയക്ക് വിധേയനാകും. എനിക്ക് ജീവിക്കണം. ഇതെന്റെ അവസാന ഊഴമാണ്’. ഇതായിരുന്നു ശസ്ത്രക്രിയക്ക് മുന്പായി ഡേവിഡ് ബെനറ്റ് പറഞ്ഞത്. ഇദ്ദേഹത്തിന്റെ ഹൃദയം ഇപ്പോള് പ്രവര്ത്തിക്കുന്നത് വിദഗ്ധര് നിരീക്ഷിച്ചു വരികയാണ്. മനുഷ്യ ഹൃദയത്തിനായി ഒരുപാട് ശ്രമിച്ചെങ്കിലും കിട്ടാത്ത സാഹചര്യത്തിലാണ് അവസാന ശ്രമമെന്ന നിലയില് പരീക്ഷണത്തിന് ശാസ്ത്രലോകം മുതിര്ന്നത്.
നിര്ണായകമായ ശസ്ത്രക്രിയകള് നടന്ന ശേഷമുള്ള ദിവസങ്ങള് ഏറെ സങ്കീര്മാണെന്ന് മെഡിക്കല് സംഘം പറഞ്ഞു. ബെനറ്റന്റെ ആരോഗ്യം സസൂക്ഷ്മം നിരീക്ഷിച്ച് വരികയാണെന്നും ഇതുവരെ ആരോഗ്യപരമായ പ്രശ്നങ്ങളൊന്നും ഉണ്ടായിട്ടില്ലെന്നും ഡോക്ടര്മാര് അറിയിച്ചു.
അമേരിക്കയില് അവയവം മാറ്റിവെയ്ക്കാനായി കാത്തിരിക്കുന്നവരില് പന്ത്രണ്ടോളം പേര് ദിവസേന മരിക്കുന്നു. അവയവം ലഭ്യമല്ലാത്തതാണ് കാരണം. 3817 അമേരിക്കക്കാരില് കഴിഞ്ഞ തവണ മനുഷ്യ ഹൃദയം മാറ്റിവെയ്ക്കുകയുണ്ടായി. പക്ഷേ ശസ്ത്രക്രിയക്കായി കാത്തിരിക്കുന്നവര് അതിലേറെയാണ്.
ഇതോടെയാണ് പന്നികളുടെ ഹൃദയം മാറ്റിവെയ്ക്കാനുള്ള സാധ്യത ശാസ്ത്രലോകം തേടിയത്. പുതിയ ജീന് എഡിറ്റിംഗും ക്ലോണിംഗ് സാങ്കേതികവിദ്യകളും ഗവേഷണം ഊര്ജിതമാക്കി. ജനിതകമാറ്റം വരുത്തിയ പന്നിയുടെ വൃക്ക മസ്തിഷ്ക മരണം സംഭവിച്ച ഒരാള്ക്ക് വിജയകരമായി നേരത്തെ ഘടിപ്പിച്ചിരുന്നു. മാസങ്ങള്ക്ക് ശേഷമാണ് ഹൃദയം മാറ്റിവെക്കല് ശസ്ത്രക്രിയ നടന്നത്.