പെരുമ്പാവൂര്: മുടക്കുഴ ഗ്രാമപഞ്ചായത്തിലെ രാജീവ് ഗാന്ധി കോളനിയിലെ മൈലപ്പറമ്പില് അലക്സിനും കുടുംബത്തിനും ഒരു വീട് സ്വന്തമാവുകയാണ്. എല്ദോസ് കുന്നപ്പിള്ളി എംഎല്എ മണ്ഡലത്തില് നടപ്പിലാക്കുന്ന എന്റെ വീട് പെരുമ്പാവൂര് ഭവന പദ്ധതിയില് ഉള്പ്പെടുത്തി അലക്സിനും കുടുംബത്തിനും നിര്മ്മിച്ചു നല്കുന്ന വീടിന് തറക്കലിട്ടു. അലക്സാണ്ടറുടെ ഇപ്പോഴത്തെ ഭവനം ഒരു കാറ്റ് വന്നാല് ഇടിഞ്ഞു വീഴുന്ന അവസ്ഥയിലാണ്. മരത്തടി കൊണ്ട് താങ്ങി നിര്ത്തിയിരിക്കുന്ന, വാതിലുകള് ഇല്ലാത്ത വീട്ടിലാണ് അലക്സും ഭാര്യ സീനയും ഇപ്പോള് താമസിക്കുന്നത്. 2 കിടപ്പു മുറികളും അടുക്കളയും ശുചിമുറികളും ഉള്പ്പെടുന്ന സുരക്ഷിതമായ ഭവനം ഈ കുടുംബത്തിന് നിര്മ്മിച്ചു നല്കുമെന്ന് എല്ദോസ് കുന്നപ്പിള്ളി പറഞ്ഞു. എന്റെ വീട് പെരുമ്പാവൂര് പദ്ധതിയിലെ പത്താമത്തെ ഭവനമാണ് ഇത്.
കെ. കരുണാകരന് മുഖ്യമന്ത്രിയും പി.പി തങ്കച്ചന് എം.എല്.എയും ആയിരുന്ന കാലഘട്ടത്തില് ഹൗസിംഗ് ബോര്ഡിന്റെ സഹായത്തോടെ നിര്മ്മിച്ചു നല്കിയ 14 വീടുകളില് ഏഴ് വീടുകളില് മാത്രമാണ് ഇപ്പോള് താമസം ഉള്ളത്. ഏറ്റവും മോശമായ അവസ്ഥയിലുള്ള ഒറ്റമുറി വീടുകള് ആണ് രാജീവ് ഗാന്ധി കോളനിയിലുള്ളത്.
ലോക്ക് ഡൗണ് സമയത്ത് കോളനിയിലെ നിവാസികളുടെ ആവശ്യപ്രകാരം ഭക്ഷ്യ വസ്തുക്കള് അടങ്ങുന്ന കിറ്റ് നല്കുവാന് ചെന്നപ്പോഴാണ് കോളനിയിലെ വീടുകളുടെ അവസ്ഥ എല്ദോസ് കുന്നപ്പിള്ളിയുടെ ശ്രദ്ധയില്പ്പെടുന്നത്. ഇവിടുത്തെ 3 കുടുംബങ്ങള്ക്ക് മാത്രമാണ് പട്ടയം ഉള്ളത്. അലക്സാണ്ടറിന്റെ സ്ഥലത്തിന് ഇതുവരെ പട്ടയം കിട്ടിയിട്ടില്ലത്തതിനാല് ലൈഫ് ഭവന പദ്ധതിയിലോ മറ്റു സര്ക്കാര് പദ്ധതികളിലോ ഉള്പ്പെടുത്തി വീട് നിര്മ്മിക്കുന്നതിനുള്ള ധനസഹായം ലഭ്യമായിരുന്നില്ല. കൂലിപ്പണിക്കാരായ അലക്സിനും സീനക്കും 3 മക്കള് ആണ് ഉള്ളത്.
വിവാഹപ്രായമായ പെണ്കുട്ടികളും അമ്മമാരും പ്രായമായവരും കോളനിയില് താമസിക്കുന്നുണ്ട്. നല്ല ഉറപ്പുള്ള വാതിലുകളോ നല്ലൊരു ശുചിമുറിയോ ഉള്ള വീടുകള് ഇവിടെയില്ല. അതില് തന്നെ ഒരു വീടിന്റെ കോണ്ക്രീറ്റ് മരത്തടി കൊണ്ട് താങ്ങി നിര്ത്തിയിരിക്കുകയാണ്.
അപേക്ഷ നല്കി നീണ്ട വര്ഷങ്ങളുടെ കാത്തിരിപ്പിന് ശേഷം ഉമ്മന് ചാണ്ടി മുഖ്യമന്ത്രി ആയിരുന്നപ്പോള് സുതാര്യ കേരളം പരിപാടിയില് നല്കിയ പരാതിയെ തുടര്ന്നാണ് അവിടെയുള്ള ഏഴ് കുടുംബങ്ങളില് നാല് കുടുംബങ്ങള്ക്ക് പട്ടയം ലഭിക്കുന്നത്. ബാക്കിയുള്ള മൂന്ന് കുടുംബങ്ങള്ക്കും കൂടി പട്ടയം ലഭ്യമാക്കുന്നതിന് ഇതുവരെ സാധിച്ചിട്ടില്ല. ഇവിടെ തന്നെ താമസിക്കുന്ന പങ്കിമല വീട്ടില് പ്രഭാകരനും കുടുംബത്തിന്റെയും ഭവനം കുറച്ചു നാളുകള്ക്ക് മുന്പ് എല്ദോസ് കുന്നപ്പിള്ളി എംഎല്എ മുന്കൈ എടുത്തു പുതുക്കി നിര്മ്മിച്ചു നല്കിയിരുന്നു.
ബ്ലോക്ക് പഞ്ചായത്ത് വൈസ് പ്രസിഡന്റ് മനോജ് മൂത്തേടന്, ഗ്രാമപഞ്ചായത്ത് വൈസ് പ്രസിഡന്റ് എ.ടി അജിത് കുമാര്, പഞ്ചായത്ത് അംഗം പി.കെ രാജു, പോള് കെ. പോള്, ബിജു ജേക്കബ്, പോള് പൊട്ടക്കല്, എല്ദോ സി. പോള്, നോയല് ജോസ് എന്നിവര് ചടങ്ങില് സംബന്ധിച്ചു.