പാലക്കാട്: വടക്കഞ്ചേരി അപകടത്തിന് ശേഷം കടന്നു കളഞ്ഞ ഡ്രൈവര് ജോമോന്റെ അറസ്റ്റ് രേഖപ്പെടുത്തി. ഒളിവില് പോകാനായി തിരുവനന്തപുരത്തേയ്ക്ക് സഞ്ചരിക്കവേ കൊല്ലം ചവറയില് നിന്നാണ് ജോമോനെ പിടികൂടിയത്. ജോമോന്റെ അറസ്റ്റ് രേഖപ്പെടുത്തി. പാലക്കാട് നിന്ന് കടന്നുകളഞ്ഞത് സ്വിഫ്റ്റ് കാറിലാണെന്നും ജോമോന് പിടിയിലാകുമ്പോള് പരിക്കുകള് ഉണ്ടായിരുന്നുവെന്നും പൊലീസ് വെളിപ്പെടുത്തി. ഒപ്പം ഉണ്ടായിരുന്ന 2 പേരും പിടിയിലായി. അറസ്റ്റിലായ ബസുടമ അരുണ്, മാനേജര് ജെസ്വിന് എന്നിവരെയും ജോമോനൊപ്പം വടക്കഞ്ചേരി പോലീസ് സ്റ്റേഷനില് എത്തിച്ചിട്ടുണ്ട്.
ഫോണ് കേന്ദ്രീകരിച്ചുള്ള അന്വേഷണമാണ് ജോമോനെ കുടുക്കിയത്. കെഎസ്ആര്ടിസി ബസ് പെട്ടെന്ന് ബ്രേക്ക് ചെയ്തതിനാലാണ് പുറകില് ചെന്ന് ഇടിച്ചതെന്നാണ് ജോമോന് പറയുന്നത്. ഡ്രൈവിംഗ് സമയത്ത് ഉറങ്ങിപ്പോയിട്ടില്ലെന്നും കെഎസ്ആര്ടിസി പെട്ടെന്ന് ബ്രേക്ക് ചെയ്തതിനാല് ടൂറിസ്റ്റ് ബസിന്റെ നിയന്ത്രണം നഷ്ടമായെന്നുമാണ് വിശദീകരണം. വളരെക്കാലമായി താന് ഡ്രൈവറായി ജോലി ചെയ്യുകയാണെന്നും തന്റെ ഭാഗത്ത് തെറ്റുണ്ടായിട്ടില്ലെന്നുമാണ് ഇയാള് പറയുന്നത്. അപകടം നടന്ന സ്ഥലത്ത് യാത്രക്കാരന് ഇറങ്ങാന് ഉണ്ടായിരുന്നതിനാല് ബസ് ബ്രേക്കിട്ടുവെന്നാണ് ജോമോന് അവകാശപ്പെടുന്നത്. എന്നാല് ആ സ്ഥലത്ത് ആരും ഇറങ്ങാന് ഇല്ലായിരുന്നുവെന്നാണ് അപകടത്തില്നിന്ന് തലനാരിഴയ്ക്ക് രക്ഷപ്പെട്ട യാത്രക്കാരന് പറയുന്നത്. ബസിന്റെ പിന്ഭാഗത്തുണ്ടായിരുന്ന ഇയാള് ഇറങ്ങേണ്ട സ്ഥലം എത്താറായതോടെ മുന്നോട്ടേക്ക് പോകുകയായിരുന്നു. താന് നില്ക്കുകയായിരുന്നുവെന്നും ഉറങ്ങിയിട്ടില്ലാത്തതിനാല് ഓര്മയുണ്ടെന്നും യാത്രക്കാരന് വ്യക്തമാക്കി.
അതേസമയം, ടൂറിസ്റ്റ് ബസ് ഡ്രൈവറുടെ പിഴവ് തന്നെയാണ് അപകടകാരണമെന്ന് ട്രാന്സ്പോര്ട്ട് കമ്മീഷണര് റിപ്പോര്ട്ട് നല്കിയിട്ടുണ്ട്. ഒരു കാറിനെ ഇടത് വശത്തുകൂടി ഓവര്ടേക്ക് ചെയ്യാന് ശ്രമിച്ചുവെന്നും ടൂറിസ്റ്റ് ബസ് അമിത വേഗത്തിലായിരുന്നുവെന്നും റിപ്പോര്ട്ടിലുണ്ട്. ഗതാഗത മന്ത്രിക്കാണ് അദ്ദേഹം റിപ്പോര്ട്ട് സമര്പ്പിച്ചത്. എന്നാല് കാറിന്റെ കാര്യം ജോമോന് പോലീസിന് നല്കിയ മൊഴിയില് പറഞ്ഞിട്ടില്ല. പുലര്ച്ചെ വേളാങ്കണ്ണി യാത്ര കഴിഞ്ഞ് മടങ്ങിയെത്തിയ ജോമോന് രാത്രി വീണ്ടും ബസ് ഓടിക്കുകയായിരുന്നു.
വടക്കഞ്ചേരി വാഹനാപകടത്തില് ടൂറിസ്റ്റ് ബസിന്റെ അമിത വേഗമാണ് അപകട കാരണമെന്ന് ഹൈക്കോടതിയില് കെഎസ്ആര്ടിസി വ്യക്തമാക്കി. ഹൈക്കോടതി നിര്ദേശത്തെ തുടര്ന്നു സമര്പ്പിച്ച റിപ്പോര്ട്ടിലാണ് ഇക്കാര്യം അറിയിച്ചിരിക്കുന്നത്.