മൂവാറ്റുപുഴ: തൊഴുത്ത് വൃത്തിയാക്കുന്നതിനിടെ അമ്പലകാളയുടെ കുത്തേറ്റ് വൃദ്ധന്‍ മരിച്ചു. പോത്താനിക്കാട് ഇല്ലിച്ചുവട് മയിലാടുംപാറയില്‍ മാത്യൂസ് ജോസഫ് (61) ആണ് മരിച്ചത്. ഇന്നലെ വൈകിട്ട് 4.30 ഓടെയാണ് സംഭവം. വെള്ളൂര്‍ക്കുന്നം മഹാദേവക്ഷേത്രംവക അമ്പലകാളയാണ് കുത്തിയത്.
ശിവരാത്രിയോടനുബന്ധിച്ച് ക്ഷേത്രത്തിലെ കൂലിപ്പണിക്കായി എത്തിയതായിരുന്നു ജോണ്‍. വൈകിട്ടോടെ മറ്റ് ശുചീകരണ പ്രവര്‍ത്തനങ്ങള്‍ക്കുശേഷം ക്ഷേത്രാങ്കണത്തിന് പുറത്ത് ചുറ്റുമതിലിലുള്ള അമ്പലകാളയുടെ തൊഴുത്ത്. വൃത്തിയാക്കുന്നതിന് കാളയുടെ അടുത്തെത്തിയ ജോണ്‍ കെട്ടിയിട്ടിയശേഷം ചാണകവും മറ്റും നീക്കം ചെയ്യുന്നതിനിടയില്‍ കയര്‍ അഴിഞ്ഞതോടെ കാള ജോണിനെ കുത്തുകയായിരുന്നു. തുടര്‍ന്ന് നിലത്ത് വീണ ജോണിന്റെ അലര്‍ച്ചകേട്ട് സമീപത്തെ ജീവനക്കാരോടിയെത്തി കാളയുടെ ശ്രദ്ധ മറ്റൊരു ദിശയിലേക്ക് മാറ്റുന്നതിനിടെ ജോണിനെ എടുത്ത് ആദ്യം സമീപത്തെ നെടുംചാലില്‍ ആശുപത്രിയില്‍ എത്തിച്ച് അവിടെനിന്ന് നിര്‍മ്മല ആശുപത്രിയിലേക്ക് കൊണ്ടുപോകുംവഴി മരണപ്പെട്ടു.
കൈയും നെഞ്ചിനും പരിക്കേറ്റിട്ടുണ്ട്. മൃതദേഹം നിര്‍മ്മല ആശുപത്രിയിലെ മോര്‍ച്ചറിയിലേക്ക് മാറ്റി. ക്ഷേത്രത്തിലെ കാളയേയും മറ്റ് പശുക്കളേയും നോക്കുന്നതിന് ജീവനക്കാരുണ്ടായിരുന്നു. എന്നാല്‍ ഇവര്‍ ബലി തര്‍പ്പണത്തിനായി വീടുകളില്‍ പോയിരിക്കുകയായിരുന്നു. തൊഴുത്ത് ശുചീകരണത്തിനും മറ്റും ജോണിനെ ചുമതലപ്പെടുത്തിയിരുന്നില്ല. ജോണിന്റെ രണ്ട് സുഹൃത്തുക്കള്‍ ശിവരാത്രിക്ക് സഹായികളായി ക്ഷേത്രത്തിലുണ്ടായിരുന്നു. എന്നാല്‍ ഇവരും ജോണ്‍ ശുചീകരണത്തിന് പോയത് അറിഞ്ഞിരുന്നില്ല. ബഹളംകേട്ടാണ് ഇവരും ഓടിയെത്തിയത്. ഭാര്യ: ഗ്രേസി. മക്കള്‍: ജിജോ, ജിന്‍സ്, ജിസി.
