തിരുവനന്തപുരം: മിഠായി പദ്ധതി അതുല്യ എന്ന പതിനൊന്നുകാരിയ്ക്ക് പകര്‍ന്നു നല്‍കിയ ആശ്വാസം ചെറുതല്ല. എസ്എടിയിലെ ശിശുരോഗ വിഭാഗത്തിന് കീഴില്‍ കുട്ടികള്‍ക്കും കൗമാരക്കാര്‍ക്കുമായുള്ള ഡയബറ്റിക് ക്ലിനിക്കില്‍ ചികിത്സയിലുള്ള കുട്ടിയാണ് ഏഴാം ക്ലാസുകാരിയും വക്കം സ്വദേശിനിയുമായ അതുല്യ. സാമൂഹ്യ സുരക്ഷാ മിഷന്റെ പദ്ധതി പ്രകാരം അതുല്യയ്ക്ക് ഇന്ന് അഞ്ചു ലക്ഷത്തിലധികം രൂപ വിലവരുന്ന ഇന്‍സുലിന്‍ പമ്പ് സ്വന്തമായി കഴിഞ്ഞു.
രക്തത്തിലെ പഞ്ചസാരയുടെ അളവിലുണ്ടാകുന്ന വ്യതിയാനം അതുല്യയ്ക്ക് ഏറെ ബുദ്ധിമുട്ട് സൃഷ്ടിച്ചിരുന്നു. സാധാരണ രീതിയിലുള്ള ഇന്‍സുലിന്‍ നല്‍കല്‍ കാര്യമായ പ്രയോജനം നല്‍കിയിരുന്നുമില്ല. ഒരു ഇന്‍സുലിന്‍ പമ്പ് വാങ്ങാനുള്ള സാമ്പത്തിക ശേഷി അതുല്യയുടെ രക്ഷിതാക്കള്‍ക്ക് ഉണ്ടായിരുന്നില്ല. കുട്ടിയുടെ സാഹചര്യം ആള്‍ മിഠായി ക്ലിനിക്കിലെ ടെക്‌നിക്കല്‍ കമ്മറ്റി പരിശോധിക്കുകയും ആശുപത്രി സൂപ്രണ്ട് ഡോ എ സന്തോഷ് കുമാര്‍, മിഠായി ക്ലിനിക്കിലെ മെഡിക്കല്‍ ഓഫീസര്‍ ഡോ റിയാസ് എന്നിവര്‍ ഇടപെട്ട് സംസ്ഥാന സാമൂഹ്യ സുരക്ഷാ മിഷനിലൂടെ ഇന്‍സുലിന്‍ പമ്പ് സൗജന്യമായി ലഭ്യമാക്കാനുള്ള നടപടികള്‍ സ്വീകരിക്കുകയുമായിരുന്നു.
തിങ്കളാഴ്ച അതുല്യയുടെ ആഗ്രഹം സഫലമായി. സാമൂഹ്യ സുരക്ഷാ മിഷന്‍ വഴി മിഠായി പദ്ധതിയിലൂടെ ഇന്‍സുലിന്‍ പമ്പ് ലഭിക്കുന്ന രണ്ടാമത്തെ കുട്ടിയാണ് അതുല്യ. നേരത്തേ വി കെയര്‍ പദ്ധതിയിലൂടെ ഒരു കുട്ടിയ്ക്കും ഇന്‍സുലിന്‍ പമ്പ് നല്‍കിയിട്ടുണ്ടെന്ന് ഡോ റിയാസ് പറഞ്ഞു. ക്ലിനിക്കില്‍ മുന്നൂറിലധികം കുട്ടികളാണ് ചികിത്സയിലുള്ളത്. അതില്‍ മിഠായി പദ്ധതിയില്‍ രജിസ്റ്റര്‍ ചെയ്തിട്ടുള്ളവര്‍ 150 കുട്ടികളാണ്. ഇന്‍സുലിന്‍ പമ്പിനു പുറമേ കണ്ടിന്യുയിംഗ് ഗ്ലൂക്കോസ് മോണിറ്ററിംഗ് സംവിധാനം, ഇന്‍സുലിന്‍ പേന, ഇന്‍സുലിന്‍, ഗ്ലൂക്കോമീറ്റര്‍,സ്ട്രിപ്പുകള്‍ എന്നിവയും നല്‍കുന്നുണ്ട്.
കഴിഞ്ഞ അഞ്ചു വര്‍ഷമായി എസ്എടിയിലെ ശിശുരോഗ വിഭാഗത്തിന് കീഴില്‍ കുട്ടികള്‍ക്കും കൗമാരക്കാര്‍ക്കുമായി ഡയബറ്റിക് ക്ലിനിക് പ്രവര്‍ത്തിച്ചു വരുന്നു. ആദ്യമൊക്കെ ക്ലിനിക്ക് വഴി ചികിത്സാ നിര്‍ദ്ദേശങ്ങള്‍ മാത്രമേ കൊടുക്കാന്‍ കഴിഞ്ഞിരുന്നുള്ളൂ. പിന്നീട് ആരോഗ്യ വകുപ്പു മന്ത്രി കെ കെ ശൈലജ ടീച്ചറുടെ ശ്രമഫലമായി സര്‍ക്കാരിന്റെ വിവിധ പദ്ധതികളായ മിഠായി പദ്ധതി, ആരോഗ്യ കിരണം, ആര്‍ബിഎസ്‌കെ എന്നിവ വഴി ഇന്‍സുലിന്‍, ഗ്ലൂക്കോമീറ്റര്‍ സ്ട്രിപ്പുകള്‍ എന്നിവ നല്‍കി വരുന്നു.
