കോഴിക്കോട്: വടകരയില്‍ കെ മുരളീധരന്റെ സ്ഥാനാര്‍ത്ഥിത്വം കോണ്‍ഗ്രസ് ഔദ്യോഗികമായി പ്രഖ്യാപിക്കാത്തത് തെരഞ്ഞെടുപ്പ് ചര്‍ച്ചയാക്കി എല്‍ഡിഎഫ്. വടകരയിലെ ജനങ്ങളോട് വോട്ട് ചോദിക്കാന്‍ കെ മുരളീധരന് ജാള്യതയുണ്ടെന്നായിരുന്നു സിപിഎം നേതാവ് എളമരം കരീമിന്റെ പ്രതികരണം.
എന്നാല്‍ യാതൊരു അനിശ്ചിതത്വവും തന്റെ സ്ഥാനാര്‍ത്ഥിത്വത്തിന്റെ കാര്യത്തിലില്ലെന്ന് മുരളീധരന് പറഞ്ഞു. പി ജയരാജന്റെ തോല്‍വി ഭയന്നുള്ള വെപ്രാളമാണ് ഇടത് ക്യാമ്പിനെന്ന് മുരളീധരന് തിരിച്ചടിക്കുന്നു.
നാമനിര്‍ദേശ പത്രിക നല്‍കാനുള്ള സമയം തുടങ്ങിയിട്ടും വയനാട്ടിലും വടകരയിലും യുഡിഎഫ് സ്ഥാനാര്‍ത്ഥികളെ പ്രഖ്യാപിക്കാത്തത് എല്‍ഡിഎഫ് ആയുധമാക്കുകയാണ്. വടകരയിലും സ്ഥാനാര്‍ത്ഥിയെ മാറ്റിയേക്കും, മുരളി വെറുതെ വെയിലുകൊള്ളേണ്ട എന്നൊക്കെയുള്ള പരിഹാസമാണ് ഇടത് ക്യാമ്പ് ഉയര്‍ത്തുന്നത്.
