തിരുവനന്തപുരം: പ്ലാച്ചിമടയില് കൊക്കക്കോള കമ്പനി കൈവശം വെച്ചിരിക്കുന്ന ഭൂമിയും കെട്ടിടവും സര്ക്കാരിന് കൈമാറാന് കമ്പനി തീരുമാനിച്ചു. 35 ഏക്കര് ഭൂമിയും കെട്ടിടവും കൈമാറാനാണ് കമ്പനി തീരുമാനിച്ചിരിക്കുന്നത്. തീരുമാനം കമ്പനി സിഇഒ ജുവാന് പാബ്ലോ റോഡ്രീഗസ് മുഖ്യമന്ത്രി പിണറായി വിജയനെ കത്തിലൂടെ അറിയിക്കുകയായിരുന്നു.
വൈദ്യതി മന്ത്രി കെ കൃഷ്ണന്കുട്ടിയുടെ നേതൃത്വത്തില് നടത്തിയ ചര്ച്ചയുടെ അടിസ്ഥാനത്തിലാണ് ഭൂമി കൈമാറാന് കമ്പനി തയ്യാറായത്. കര്ഷകരുടെ നേതൃത്വത്തില് ആരംഭിക്കാന് പോകുന്ന ഫാര്മര് പ്രൊഡ്യൂസര് ഓര്ഗനൈസേഷന് കമ്പനിയുടെ കൈവശമുളള ഭൂമി വിട്ടുനല്കണമെന്നായിരുന്നു സംസ്ഥാന സര്ക്കാരിന്റെ ആവശ്യം. ഇതിന് പുറമെ കര്ഷകര്ക്ക് വേണ്ടി ഒരുക്കുന്ന ഡെമോ ഫാമിന്റെ നിര്മ്മാണത്തിന് സാങ്കേതിക സഹായം നല്കാന് തയ്യാറാണെന്നും കൊക്കക്കോള കമ്പനി അറിയിച്ചു.
