കന്യാസ്ത്രീയെ പീഡിപ്പിച്ച കേസില് ബിഷപ്പ് ഫ്രാങ്കോ മുളയ്ക്കലിന് അനുകൂലമായ വിധിയില് സംശയം പ്രകടിപ്പിച്ച് അന്വേഷണ ഉദ്യോഗസ്ഥന് എസ്.പി ഹരിശങ്കര്. സത്യസന്ധമായി ഇരയുടെ മൊഴി ഉണ്ടായിട്ടും തിരിച്ചടിയാണ് കോടതി വിധി. ഇതിനെതിരെ അപ്പീല് സമര്പ്പിക്കുമെന്നും അദ്ദേഹം പറഞ്ഞു.
ബലാത്സംഗ കേസുകളില് തെളിവുകളുടെ വിലയിരുത്തലിനെ കുറിച്ച് ഹൈക്കോടതി വ്യക്തമായ നിര്ദ്ദേശം നല്കിയിട്ടുള്ളതാണ്. അത് ഈ വിധിയില് പാലിച്ചുകണ്ടില്ലെന്നും അദ്ദേഹം സംശയം പ്രകടിപ്പിച്ചു. ശാസ്ത്രീയ തെളിവുകള് വരെ ഇതിനൊപ്പം നല്കിയത് കോടതി പരിഗണിച്ചിട്ടില്ല. വിധിയുടെ പകര്പ്പ് ലഭിച്ച ശേഷം വിശദമായി പഠിച്ച് അപ്പീല് നല്കുമെന്നും അദ്ദേഹം വ്യക്തമാക്കി. 100 ശതമാനം ശിക്ഷ പ്രതീക്ഷിച്ചിരുന്നതായും ഹരിശങ്കര് പറഞ്ഞു.
ഒരു രീതിയിലും അംഗീകരിക്കാന് പറ്റുന്ന വിധിയല്ല ഇതെന്നും കൃത്യമായ ശാസ്ത്രീയ തെളിവുകള് ഉണ്ടായിരുന്നിട്ടും എന്തുകൊണ്ട് ഇത്തരത്തിലൊരു വിധി വന്നെന്ന് മനസിലാകുന്നില്ലെന്നും ഹരിശങ്കര് പറഞ്ഞു. ഇത്തരം കേസുകളില് അനുഭാവപൂര്ണമായ നിലപാട് സ്വീകരിക്കണമെന്ന് സുപ്രീം കോടതിയുടെ മാര്ഗനിര്ദേശമുണ്ട്.
ഇത്രയും ശാസ്ത്രീയ തെളിവുകള് ഉണ്ടായിട്ടും പ്രതിയെ വെറുതെവിട്ട നടപടി ഇന്ത്യന് നീതിന്യായ ചരിത്രത്തില് തന്നെ ആദ്യത്തെ സംഭവമായിരിക്കുമെന്നും അദ്ദേഹം കൂട്ടിച്ചേര്ത്തു.
