മൂവാറ്റുപുഴ : ഗ്രാമീണ മേഘലയില്‍ ആരോഗ്യ പരിപാലനത്തിനായി ഓപ്പണ്‍ ജിമ്മുകളും അനുബന്ധ സൗകര്യങ്ങളും കൂടുതല്‍ പ്രയോജനപ്പെടുത്തണമെന്ന് മുന്‍ ജില്ലാ പഞ്ചായത്ത് പ്രസിഡന്റും ആവോലി ഡിവിഷന്‍ മെമ്പറുമായ ഉല്ലാസ് തോമസ് പറഞ്ഞു പറഞ്ഞു. ജില്ലാ പഞ്ചായത്ത് ജനകീയസൂത്രണ പദ്ധതിയില്‍ ഉള്‍പ്പെടുത്തി 15 ലക്ഷം രൂപ ചിലവില്‍ ആവോലി ഡിവിഷനിലെ ആവോലി പഞ്ചായത്തില്‍ സ്ഥാപിച്ച ഓപ്പണ്‍ ജിം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നാലാം വാര്‍ഡിലെ ആനിക്കാട് ചിറക്ക് സമീപത്താണ് ഓപ്പണ്‍ ജിം സ്ഥാപിച്ചിട്ടുള്ളത്.ചുറ്റും വാക്ക് വേ യോടുകൂടിയ നാലേക്കറോളം വരുന്ന ചിറക്ക് സമീപത്താണ് ജിം ഉപകരണങ്ങള്‍ സജ്ജമാക്കിയിരിക്കുന്നത്. ഇവിടെ ജില്ലാ പഞ്ചായത്തിന്റെ പിന്‍ കഫേയും പ്രവര്‍ത്തിക്കുന്നുണ്ട്
ജില്ലാ പഞ്ചായത്തിന്റെ 2022-23 വാര്‍ഷിക പദ്ധതിയില്‍ ഉള്‍പ്പെടുത്തിയാണ് ഓപ്പണ്‍ ജിം സ്ഥാപിച്ചത് . ഉയര്‍ന്ന ഗുണനിലവാരമുള്ള പത്ത് ഉപകരണങ്ങളാണ് സ്ഥാപിച്ചത് . ജിം ഉപകരണങ്ങള്‍ക്കൊപ്പം അടിസ്ഥാന സൗകര്യങ്ങള്‍ ഒരുക്കുന്നതിനും വേണ്ടിയാണ് 15 ലക്ഷം രൂപ അനുവദിച്ചിരിക്കുന്നതെന്ന് ഉല്ലാസ് തോമസ് പറഞ്ഞു. സ്ത്രീകള്‍ ഉള്‍പ്പെടെ ഏതൊരാള്‍ക്കും ഈ ഓപ്പണ്‍ ജിമ്മില്‍ വ്യായാമം ചെയ്യാം.
ചടങ്ങില്‍ ഗ്രാമ പഞ്ചായത്ത് പ്രസിഡന്റ് ഷെല്‍മി ജോണ്‍സ് അധ്യക്ഷത വഹിച്ചു. വൈസ് പ്രസിഡന്റ് ജോര്‍ജ് തെക്കുംപുറം സ്വാഗതം പറഞ്ഞു. സ്റ്റാഡിംഗ് കമ്മിറ്റി ചെയര്‍മാന്‍ മാരായ ആന്‍സമ്മ വിന്‍സന്റ്, ബിന്ദു ജോര്‍ജ് പഞ്ചായത്ത് അംഗങ്ങളായ അഷറഫ് മൊയ്തീന്‍ , ബിജു മുള്ളന്‍കുഴി എന്നിവര്‍ സംസാരിച്ചു. മുഹമ്മദ് കാഞ്ഞിരക്കാട്ട് മറ്റ് ജനപ്രതിനിതികളും വിവിധ നേതാക്കളും സംബന്ധിച്ചു.
