തൃശ്ശൂര്‍ : കരുവന്നൂര്‍ ബാങ്കിലേക്ക് സഹകരണ ബാങ്കുകളില്‍ നിന്നുള്ള നിക്ഷേപം ഉറപ്പാക്കാനുള്ള തീവ്രശ്രമത്തില്‍ സര്‍ക്കാര്‍. ഒപ്പം കേരള ബാങ്കിലെ കരുതല്‍ നിധിയില്‍ നിന്ന് പണം എടുക്കുന്നതിനുള്ള കാലതാമസവും തടസങ്ങളും മറികടക്കാനും തിരക്കിട്ട കൂടിയാലോചനകള്‍ നടക്കുകയാണ്. നാളെ കൊച്ചിയിലാണ് കേരള ബാങ്ക് പ്രതിനിധികളുമായി സഹകരണ മന്ത്രി ചര്‍ച്ച നടത്തുന്നത്.
കരുതല്‍ ധനത്തിന്റെയും സ്വര്‍ണപ്പണയ വായ്പയുടെയും വിശദാംശങ്ങള്‍ നിക്ഷേപകരെ അറിയിക്കും. ഇക്കാര്യങ്ങള്‍ വ്യക്തമാക്കുന്ന ബോര്‍ഡ് എല്ലാ പ്രാഥമിക സഹകരണ ബാങ്കുകളിലും സ്ഥാപിക്കും. ആശങ്കമാറ്റാന്‍ സഹകാരികളും ബാങ്ക് ജീവനക്കാരും ചൊവ്വാഴ്ച മുതല്‍ ഗൃഹസന്ദര്‍ശനം നടത്തും. കരുവന്നൂര്‍ തട്ടിപ്പ് സഹകരണമേഖലയുടെ വിശ്വാസ്യതയെ ബാധിച്ചതോടെയാണ് സിപിഎമ്മിന്റെയും സര്‍ക്കാരിന്റെയും ഇടപെടലില്‍ അടിയന്തര നീക്കം.
