അടുത്ത നിയമസഭ തെരഞ്ഞെടുപ്പില് മത്സരിക്കാനില്ലെന്ന് മുതിര്ന്ന ബിജെപി നേതാവും മുന് മുഖ്യമന്ത്രിയുമായിരുന്ന ബി എസ് യെദിയൂരപ്പ. 80 വയസ് ആയി. ഇനി മത്സരിക്കാനില്ല. ദേശീയ രാഷ്ട്രീയത്തിലേക്കും ഇല്ലെന്ന് യെദിയൂരപ്പ വ്യക്തമാക്കി. കര്ണാടക നിയമസഭ തെരഞ്ഞെടുപ്പ് നടക്കാനിരിക്കെയാണ് യെദിയൂരപ്പയുടെ പ്രതികരണം.
‘എനിക്ക് 80 വയസായി. നിയമസഭാ തെരഞ്ഞെടുപ്പില് ഇനി മത്സരിക്കില്ല. അതിനര്ത്ഥം രാഷ്ട്രീയത്തില് നിന്ന് വിരമിക്കുന്നുവെന്നല്ല. സംസ്ഥാനം മുഴുവന് പര്യടനം നടത്തി ബിജെപിയെ വീണ്ടും അധികാരത്തിലെത്തിക്കും. ദേശീയ രാഷ്ട്രീയത്തില് താത്പര്യമില്ല. വാജ്പേയി ഉള്പ്പടെയുള്ളവര് ക്ഷണിച്ചിട്ടും ദേശീയ രാഷ്ട്രീയത്തിലേക്ക് പോയിട്ടില്ല. ഇനി പോകാന് താത്പര്യമില്ല,’ യെദിയൂരപ്പ പറഞ്ഞു.
അതേസമയം കോണ്ഗ്രസ് വിട്ട് ബിജെപിയിലേക്ക് പോയ എംഎല്എമാരെ വേശ്യകളെന്ന് വിളിച്ച് അധിക്ഷേപിച്ച കോണ്ഗ്രസ് നേതാവ് ബി കെ ഹരിപ്രസാദ് മാപ്പ് ചോദിച്ചു. കര്ണാടക വിജയനഗരിയിലെ ഹോസപെട്ടെയില് പുനീത് രാജ്കുമാര് സ്റ്റേഡിയത്തില് സംഘടിപ്പിച്ച വന് റാലിയില് സംസാരിക്കവെയായിരുന്നു ബി കെ ഹരിപ്രസാദിന്റെ വിവാദ പരാമര്ശം.
ജനം കേവലഭൂരിപക്ഷം നല്കാതിരുന്നതുകൊണ്ടാണ് 2018-ല് സഖ്യസര്ക്കാരുണ്ടാക്കിയതെന്ന് പറഞ്ഞ ഹരിപ്രസാദ്, സ്ഥലം എംഎല്എ കൂടിയായ മന്ത്രി ആനന്ദ് സിംഗിനെ പേരെടുത്ത് പറയാതെ അധിക്ഷേപിക്കുകയായിരുന്നു. സംസ്ഥാനത്ത് വിലക്കയറ്റമടക്കം രൂക്ഷമാക്കിയത് ബിജെപി ഭരണത്തിലെ പിടിപ്പുകേട് കൊണ്ടാണെന്നും ഹരിപ്രസാദ് വിമര്ശിച്ചു.
എന്നാല് ഇത്തരം പ്രസ്താവനകള് തരംതാണതെന്നായിരുന്നു മുഖ്യമന്ത്രിയുടെ പ്രതികരണം. പ്രസ്താവന വിവാദമായതോടെ, ബി കെ ഹരിപ്രസാദ് മാപ്പ് ചോദിച്ച് രംഗത്തെത്തി. ബിജെപി പ്രസ്താവന വളച്ചൊടിച്ചെന്നാണ് ഹരിപ്രസാദ് പറയുന്നത്.