വടകര: സൈബര്‍ ഇടങ്ങളില്‍ തനിക്കെതിരെ അധാര്‍മികമായ ഇടപെടലുകളുണ്ടായെന്ന് വടകരയിലെ എല്‍.ഡി.എഫ് സ്ഥാനാര്‍തി കെ.കെ. ശൈലജ. എന്നാല്‍, ഇത്തരം പ്രചാരണങ്ങള്‍ ബൂമറാങുപോലെ തിരിച്ചടിക്കുമെന്നും ശൈലജ മാധ്യമങ്ങളോട് പറഞ്ഞു. തന്റെ രാഷ്ട്രീയ വിശ്വാസ്യതയെപോലും ചോദ്യംചെയ്യുകയാണുണ്ടായത്. തന്നെ വ്യക്തിപരമായി അധിക്ഷേപിക്കാന്‍ വൃത്തികെട്ട മാര്‍ഗം സ്വീകരിച്ചതില്‍ ചിന്തിക്കാന്‍ കഴിയുന്നവര്‍ പ്രതിഷേധിക്കുമെന്നും അവര്‍ പറഞ്ഞു.
ഞാന്‍ എനിക്കെതിരെ ഇത്രയും വൃത്തികെട്ട ആരോപണം സൃഷ്ടിക്കുമോ? എനിക്ക് തിരഞ്ഞെടുപ്പ് ജയിക്കാന്‍ ഇത്തരം വിലകുറഞ്ഞ പണി എടുക്കേണ്ടതില്ല. എന്റെ പ്രവര്‍ത്തനങ്ങള്‍ കണ്ടറിയുന്ന ജനങ്ങള്‍ പാര്‍ലമെന്റിലും അതേ പ്രവര്‍ത്തനം വേണമെന്ന് ആഗ്രഹിച്ചാല്‍ ഞാന്‍ ജയിക്കും. ഒരു കാര്യവും മാറ്റിപ്പറയുന്നില്ല. തെളിവുകള്‍ പരാതി സമര്‍പ്പിച്ചിടത്ത് നല്‍കിയിട്ടുണ്ട്. ആവശ്യമെങ്കില്‍ ഇനിയും തെളിവുകളുണ്ടെന്നും ഷൈലജ പറഞ്ഞു.
സാമൂഹ്യമാധ്യമങ്ങള്‍വഴി തന്നെ അധിക്ഷേപിക്കാന്‍ ശ്രമിച്ചതില്‍ കക്ഷിരാഷ്ട്രീയത്തിന് അതീതമായി നല്ല ധാര്‍മികതയുള്ള മനുഷ്യരുടെ മനസ്സില്‍ പ്രതിഷേധമുണ്ട്. തന്റെ പാര്‍ട്ടിയില്‍പ്പെടാത്തവരില്‍ ചിലര്‍ വിളിച്ചിരുന്നു. തങ്ങള്‍ ചിലത് കണ്ടെന്നും അതില്‍ വിഷമിക്കരുതെന്നും അവര്‍ പറഞ്ഞു. അത്തരത്തില്‍ ചിന്തിക്കുന്ന കുറേപേരുണ്ടാകുമെന്നും അവര്‍ പറഞ്ഞു.
