ബ്രഹ്മപുരം വിഷയത്തില് കോണ്ഗ്രസിന്റെ കൊച്ചി കോര്പറേഷന് ഉപരോധത്തിനിടെ പോലീസുമായി വാക്കേറ്റം. പുലര്ച്ചെ അഞ്ച് മണിക്ക് ആരംഭിച്ച ഉപരോധസമരം പോലീസ് ഇടപടെലിനെ തുടര്ന്ന് സംഘര്ഷാവസ്ഥയിലേക്ക് നീങ്ങുകയായിരുന്നു. ഉപരോധം നിര്ത്തണമെന്ന് പോലീസ് ആവശ്യപ്പെട്ടതാണ് സംഘര്ഷത്തിന് ഇടയാക്കിയത്. ഗേറ്റിന് മുന്നില് കസേരകളിടാന് അനുവദിക്കില്ലെന്ന് പറഞ്ഞ പോലീസ് കോണ്ഗ്രസ് പ്രവര്ത്തര് ഇട്ടിരുന്ന കസേര എടുത്തുമാറ്റാന് ശ്രമിച്ചു. ഇതോടെയാണ് പ്രവര്ത്തകരും പോലീസുമായി വാക്കേറ്റം ഉണ്ടായത്.
ബ്രഹ്മപുരം തീപിടിത്തത്തില് സിബിഐ അന്വേഷണം വേണം, മേയര് രജിവയ്ക്കണം, നഗരസഭാ കൗണ്സില് യോഗത്തിനെത്തിയ കോണ്ഗ്രസ് കൗണ്സിലര്മാരെ പോലീസ് തല്ലിയതില് നടപടി വേണം തുടങ്ങിയ ആവശ്യങ്ങളുന്നയിച്ചാണ് സമരം.
കോര്പറേഷനിലേക്ക് വരുന്ന ജീവനക്കാരെ അകത്തേക്ക് കയറ്റിവിടില്ലെന്ന നിലപാടിലാണ് സമരക്കാര്. പോലീസ് മനഃപൂര്വം പ്രശ്നം സൃഷ്ടിക്കാന് ശ്രമിക്കുകയാണെന്നും സമരക്കാര് ആരോപിച്ചു. ഉപരോധ സമരം വൈകുന്നേരം വരെ തുടരുമെന്നും കോണ്ഗ്രസ് നേതൃത്വം വ്യക്തമാക്കി. കോര്പ്പറേഷനിലെത്തുന്നവരെ അകത്തേക്ക് കടത്തിവാടനുളള നടപടികള് സ്വീകരിക്കുമെന്ന് പോലീസ് സമരക്കാരോട് പറഞ്ഞു. പ്രതിഷേധങ്ങളുടെ പശ്ചാത്തലത്തില് കോര്പ്പറേഷന് ഓഫീസ് പരിസരത്തെ സുരക്ഷ പോലീസ് ശക്തമാക്കിയിട്ടുണ്ട്.