തിരുവനന്തപുരം: ‘ബ്രഹ്മപുരം മാലിന്യ പ്ലാന്റിന് തീവെച്ചത് 12 ദിവസം കൊണ്ട് കെടുത്തിയത് സര്‍ക്കാരിന്റെ വലിയ നേട്ടമാണെന്ന രീതിയിലുള്ള മന്ത്രിമാരുടെ പരാമര്‍ശങ്ങള്‍ ഇരകളായ കൊച്ചിയിലെ ജനങ്ങളെ അപമാനിക്കുന്നതിന് തുല്യമാണ്. വിഷയത്തിലെ മുഖ്യമന്ത്രിയുടെ മൗനം സംശയകരമാണെന്നും ബിജെപി സംസ്ഥാന അദ്ധ്യക്ഷന്‍ കെ സുരേന്ദ്രന്‍. കൊച്ചിയില്‍ കണ്ടത് കേരളാ മോഡലിന്റെ പരാജയം. ബ്രഹ്മപുരം വിഷയത്തില്‍ സര്‍ക്കാര്‍ പൂര്‍ണ പരാജയമായിരുന്നു. ആരോഗ്യ മന്ത്രിയും ആരോഗ്യ വകുപ്പും നോക്കുകുത്തിയായിരുന്നു. ദുരന്തത്തിന് കാരണക്കാരായ വിവാദ കമ്പനിയുടെ പ്രതിനിധികളുമായി മുഖ്യമന്ത്രി വിദേശത്ത് ചര്‍ച്ച നടത്തിയിട്ടുണ്ടോയെന്ന് വ്യക്തമാക്കണമെന്നും കെ സുരേന്ദ്രന്‍ ആവശ്യപ്പെട്ടു.
കേരളത്തിലെ നഗരങ്ങളിലെ മാലിന്യ നിര്‍മാര്‍ജ്ജനം സോന്‍ഡ കമ്പനിക്ക് നല്‍കിയത് എന്ത് ഡീലിന്റെ അടിസ്ഥാനത്തിലാണെന്ന് മുഖ്യമന്ത്രി വ്യക്തമാക്കണം,’ കെ സുരേന്ദ്രന്‍ പറഞ്ഞു. ‘കൊച്ചി കോര്‍പ്പറേഷനും സംസ്ഥാന സര്‍ക്കാരും ചേര്‍ന്ന് ലക്ഷക്കണക്കിന് ആളുകളുടെ ജീവന്‍ വെച്ച് അഴിമതി നടത്തുകയായിരുന്നു. ഇതിന് കൂട്ട് നില്‍ക്കുകയാണ് യുഡിഎഫ് ചെയ്തത്. കൊച്ചിയിലെ പരിസ്ഥിതി ആഘാതത്തെ കുറിച്ച് പഠിക്കാന്‍ സര്‍ക്കാര്‍ തയ്യാറാവണം. ജനങ്ങള്‍ക്ക് ആവശ്യമായ മെഡിക്കല്‍ സഹായങ്ങള്‍ ലഭ്യമാക്കണം. ഇക്കാര്യത്തിനായി കേന്ദ്ര ആരോഗ്യമന്ത്രാലയത്തിന്റെ സഹായം തേടാന്‍ സംസ്ഥാനം ഇനിയും മടി കാണിക്കരുത്,’ സുരേന്ദ്രന്‍ കൂട്ടിച്ചേര്‍ത്തു.
