തിരുവനന്തപുരം: നിയമസഭയില് പ്ലക്കാര്ഡും ബാനറുമുയര്ത്തി പ്രതിപക്ഷ പ്രതിഷേധം. സഭാ നടപടികളുമായി സഹകരിക്കാന് കഴിയില്ലെന്ന് പ്രതിപക്ഷ നേതാവ് വി ഡി സതീശന് പറഞ്ഞു. രാഹുല് ഗാന്ധിയുടെ ഓഫീസിലേക്ക് പൊലീസിനെ അയച്ച മോദി സര്ക്കാരിന്റെ അതേ നിലപാടാണ് സംസ്ഥാന സര്ക്കാര് സ്വീകരിക്കുന്നത്. വനിതാ എംഎല്എമാര് ഉള്പ്പടെയുള്ളവര്ക്കെതിരെ കള്ളക്കേസ് ചുമത്തിയിരിക്കുകയാണെന്നും വി ഡി സതീശന് പറഞ്ഞു.
സതീശന് പറഞ്ഞത്
പ്രതിപക്ഷത്തിന്റെ ആവശ്യങ്ങളില് തീരുമാനമായിട്ടില്ല. ഒരു ചര്ച്ചയും നടന്നിട്ടില്ല. സഭയുമായി സഹകരിച്ചു പോകാനാകില്ല. സര്ക്കാര് പ്രതിപക്ഷത്തെ മനപ്പൂര്വ്വം പ്രകോപിപ്പിക്കുകയാണ്. സര്ക്കാര് ഏകപക്ഷീയമായി പെരുമാറുന്നു. ചോദ്യങ്ങള്ക്ക് ഉത്തരം പറയാതെ രക്ഷപ്പെടാനാണ് സര്ക്കാര് ശ്രമിക്കുന്നതതെന്നും പ്രതിപക്ഷ നേതാവ് ആരോപിച്ചു.
പ്രതിപക്ഷ പ്രതിഷേധത്തിനിടെയാണ് സഭയില് ചോദ്യോത്തര വേള തുടരുന്നത്. നിയമസഭയില് മുഖ്യമന്ത്രിയെ ലക്ഷ്യമിട്ടാണ് പ്രതിപക്ഷത്തിന്റെ പ്രധാന നീക്കം. ലോ- കോളേജ് സംഘര്ഷം ഉന്നയിക്കുക, മുഖ്യമന്ത്രിയെ കൊണ്ട് മറുപടി പറയിക്കുക തുടങ്ങിയവയാണ് ലക്ഷ്യം. മുഖ്യമന്ത്രി മറുപടി പറയേണ്ട വിഷയം ഉന്നയിച്ച് നോട്ടീസ് നല്കുന്നത് തുടര്ച്ചയായി ഇത് അഞ്ചാം തവണയാണ്. ചര്ച്ചയ്ക്ക് ശേഷം മാത്രം സഹകരിച്ചാല് മതിയെന്നാണ് പ്രതിപക്ഷ തീരുമാനം.