ശതകോടീശ്വരന് ഇലോണ് മസ്ക് മൈക്രോ ബ്ലോഗിംഗ് പ്ലാറ്റ്ഫോമായ ട്വിറ്റര് ഏറ്റെടുത്തതിന് പിന്നാലെ ആദ്യത്തെ നടപടി സിഇഒ അടക്കമുള്ള ഉന്നത ഉദ്യോഗസ്ഥരെ പിരിച്ചു വിടുകയായിരുന്നു. ചീഫ് ഫിനാന്ഷ്യല് ഓഫീസര് നെഡ് സെഗാള്, പോളിസി ചീഫ് വിജയ ഗദ്ദെ ഉള്പ്പെടെയുള്ള ഉന്നത ഉദ്യോഗസ്ഥരെയും മസ്ക് പുറത്താക്കി. തന്നെ തെറ്റിദ്ധരിപ്പിച്ചെന്ന് ആരോപിച്ചായിരുന്നു മസ്കിന്റെ നടപടി.
എന്നാല്, ഇതുകൊണ്ടൊന്നും നിര്ത്താന് മസ്ക് തയ്യാറായിട്ടില്ല എന്ന് വ്യക്തമാക്കുന്നതാണ് നിലവില് പുറത്തുവരുന്ന റിപ്പോര്ട്ടുകള്. കമ്പനിയിലെ 75 ശതമാനം ജീവനക്കാരുടെയും പണി പോയേക്കും. ഇത് സംബന്ധിച്ച് നേരത്തെ റിപ്പോര്ട്ടുകള് വന്നിരുന്നെങ്കിലും ഔദ്യോഗികമായി സ്ഥിരീകരിക്കപ്പെട്ടിരുന്നില്ല. ഇപ്പോഴിതാ പിരിച്ചുവിടേണ്ട ജീവനക്കാരുടെ ലിസ്റ്റ് തയ്യാറാക്കാന് മാനേജര്മാര്ക്ക് മസ്ക് നിര്ദ്ദേശം നല്കിയതായാണ് പുതിയ റിപ്പോര്ട്ടുകള്.
കഴിഞ്ഞ ദിവസം തന്നെ ജീവനക്കാരെ പിരിച്ചുവിടാനുള്ള പദ്ധതി മസ്ക് ആരംഭിച്ചുവെന്ന് ന്യൂയോര്ക്ക് ടൈംസ് റിപ്പോര്ട്ട് ചെയ്തു. കമ്പനിയിലെ ജീവനക്കാരെ ഒഴിവാക്കേണ്ടതിന്റെ ആവശ്യകതയെ കുറിച്ച് നേരത്തെ തന്നെ മസ്ക് ചില സൂചനകള് നല്കിയിരുന്നു.
75 ശതമാനം ആളുകളെ വെട്ടി കുറച്ചാല് ചെലവ് കുറയുന്നതിനോടൊപ്പം ലാഭക്ഷമത ഉയരുമെന്നും ഇത് കൂടുതല് നിക്ഷേപകരെ കമ്പനിയിലേക്ക് ആകര്ഷിക്കാന് ഇടയാക്കുമെന്നും വിദഗ്ധര് ചൂണ്ടിക്കാട്ടിയിരുന്നു. ഇതിന്റെ ചുവടുപിടിച്ചാണ് മസ്കിന്റെ നടപടിയെന്നാണ് റിപ്പോര്ട്ടുകള് നല്കുന്ന സൂചന. എന്നാല്, ജീവനക്കാരുടെ എന്നതില് ഇത്രയും കുറവ് വരുന്നത് കമ്പനിക്ക് ദോഷമാണെന്ന അഭിപ്രായക്കാരുമുണ്ട്.
2022 ഏപ്രിലില് ട്വിറ്റര് ഏറ്റെടുക്കാനുള്ള പദ്ധതി പ്രഖ്യാപിച്ചതിന് പിന്നാലെ കമ്പനിയില് വലിയ മാറ്റങ്ങള് കൊണ്ടുവരുമെന്ന് ഇലോണ് മസ്ക് പ്രഖ്യാപിച്ചിരുന്നു.