ട്വിറ്ററില് വര്ക്ക് ഫ്രം ഹോം നിര്ത്തലാക്കി സിഐഎഒ ഇലോണ് മസ്ക്. ഓഫീസിലേക്ക് വരുന്നില്ലെങ്കില് രാജി സ്വീകരിച്ചിരിക്കുന്നു എന്നാണ് മസ്ക് ട്വിറ്റര് ജീവനക്കാരുമായി നടത്തിയ ആദ്യ കൂടിക്കാഴ്ചയില് പറഞ്ഞത്. ജീവനക്കാര് കഠിനാധ്വാനം ചെയ്യണം. ഉടന് കൂടുതല് പണം സമാഹരിച്ചില്ലെങ്കില് കമ്പനി പാപ്പരാവുമെന്നും അദ്ദേഹം പറഞ്ഞതായി രാജ്യാന്തര മാധ്യമങ്ങള് റിപ്പോര്ട്ട് ചെയ്യുന്നു.
ഇതിനിടെ ചില മുതിര്ന്ന ജീവനക്കാര് രാജിവച്ചു എന്നാണ് വിവരം. മസ്കിന്റെ പുതിയ ലീഡര്ഷിപ്പ് ടീമില് പെട്ട യോല് റോത്ത്, റോബിന് വീലര് എന്നിവര് കമ്പനി വിട്ടു.
അതേസമയം, ഇന്ത്യയില് പെയ്ഡ് വേരിഫിക്കേഷന് അവതരിപ്പിച്ചു. മറ്റ് രാജ്യങ്ങളില് എട്ട് ഡോളര് അഥവാ 645.68 രൂപയ്ക്ക് വേരിഫിക്കേഷന് ലഭ്യമാക്കുമ്പോള് ഇന്ത്യയില് തുക അല്പം കൂടും. ഇന്ത്യയില് 719 രൂപയാണ് നീല ശരി ചിഹ്നത്തിനായി നല്കേണ്ടത്.
ഇന്ത്യയിലെ ചില ഉപഭോക്താക്കള്ക്ക് ഇതിനോടകം തന്നെ വേരിഫിക്കേഷന് ചിഹ്നം നല്കുന്ന ‘ട്വിറ്റര് ബ്ലൂ’ സര്വീസ് സബ്സ്ക്രൈബ് ചെയ്യണമെന്ന ഇ-മെയില് സന്ദേശം ലഭിച്ചു കഴിഞ്ഞുവെന്ന് എന്ഡിടിവി റിപ്പോര്ട്ട് ചെയ്യുന്നു.
ട്വിറ്റര് ബ്ലൂ സബ്സ്ക്രൈബ് ചെയ്യുന്ന ഉപഭോക്താക്കള്ക്ക് വേരിഫിക്കേഷന് ഇല്ലാതെ തന്നെ ശരി ചിഹ്നം ലഭിക്കും. ഇത്തരം ഉപഭോക്താക്കള്ക്ക് ട്വിറ്ററില് താരതമ്യേന കൂടുതല് റീച്ചും ലഭിക്കും.
ഇലോണ് മസ്ക് തലപ്പത്ത് വന്നതില് പിന്നെ വ്യാപക അഴിച്ചുപണിയാണ് ട്വിറ്റര് ആസ്ഥാനത്ത് നടക്കുന്നത്. നേതൃനിരയില് നിന്ന നിരവധി പേരെ പിരിച്ചുവിട്ടു. ഇക്കൂട്ടത്തില് ട്വിറ്ററിന്റെ സിഇഒ ആയിരുന്ന ഇന്ത്യന് സ്വദേശി പരാഗ അഗര്വാളും ലീഗല് എക്സിക്യൂട്ടിവ് വിജയ് ഗദ്ദെയും ഉള്പ്പെടും.