‘ഈ നമ്പര്‍ നിലക്കില്ല, ജീവിക്കും വടകരയുടെ ജനകീയ വിഷയങ്ങള്‍ക്കൊപ്പം എംഎല്‍എയുടെ ഔദ്യോഗിക മൊബൈല്‍ നമ്പരായി. ടിപിയുടെ നെഞ്ചില്‍ വെട്ടേറ്റപ്പോള്‍ 2012 മെയ് നാലിന് നിലച്ചുപോയതാണ് ആ ഫോണ്‍ നമ്പര്‍ ഇനി ഇതില്‍ സഹായത്തിന് ഏത് രാത്രിയിലും വിളിക്കാമെന്ന് വടകര എംഎല്‍എയു കെ.കെ.രമ
കക്ഷി രാഷട്രീയ വ്യത്യാസമന്യെ സഹായത്തിന് ആരുവിളിച്ചാലും എടുക്കുമായിരുന്ന ടിപി ചന്ദ്രശേഖരന്റെ നമ്പരില്‍തന്നെ വടകരക്കാര്‍ക്ക് സഹായത്തിനായി എംഎല്‍എയെ വിളിക്കാമെന്ന് രമ ഒരു ഫേസ്ബുക്ക് ലൈവിലൂടെയാണ് പ്രഖ്യാപിച്ചത്. നിയമസഭയില്‍ താന്‍ ടിപിയുടെ ശബ്ദമാകുമെന്ന് മുന്‍പ് തന്നെ വ്യക്തമാക്കിയ രമ ഇപ്പോള്‍ വടകരക്കാര്‍ക്ക് മുന്നിലും 9447933040 എന്ന നമ്പരിലൂടെ ടിപിയുടെ ശബ്ദമാകും.
0496 2512020 എന്ന ലാന്‍ഡ് ലൈന്‍ നമ്പരാണ് എംഎല്‍എയുടെ ഓഫീസിലുപയോഗിക്കുക. മുതിര്‍ന്ന കോണ്‍ഗ്രസ് നേതാവ് കെ മുരളീധരനാണ് കെകെ രമയുടെ പുതിയ ഓഫീസ് ഉദഘാടനം ചെയ്തത്. പ്രശ്ന പരിഹാരത്തിനായി ഓഫീസിലെത്താന്‍ സാധിക്കാത്തവര്‍ക്ക് വടകരയിലെ എല്ലാവര്‍ക്കും മനപാഠമായ ടിപിയുടെ നമ്പറില്‍ തന്നെ ബന്ധപ്പെടാമെന്ന് എംഎല്‍എ അറിയിച്ചു.
ഫെയ്‌സ്ബുക്ക് പോസ്റ്റ്:
പ്രിയപ്പെട്ട സഹോദരീ സഹോദരന്മാരേ,
നിങ്ങള്‍ അപാരമായ സ്‌നേഹ വായ്‌പോടെ നിങ്ങളുടെ നിയമസഭാ പ്രതിനിധിയായി എന്നെ തിരഞ്ഞെടുത്തിട്ട് രണ്ടു മാസങ്ങളാവാറായി.
മണ്ഡലത്തിനകത്തു നിന്നും പുറത്തു നിന്നും ഏറെ ആവേശം പകരുന്ന പിന്തുണയും ഐക്യദാര്‍ഡ്യവുമാണ് കിട്ടിക്കൊണ്ടിരിക്കുന്നത്. ഒപ്പം വടകരയിലെ ജനത ഏറെ പ്രതീക്ഷയോടെയാണ് ഈ വിജയത്തെ നോക്കിക്കാണുന്നത്. നിങ്ങളുടെയെല്ലാം പിന്തുണയും സഹകരണവും ഉള്ളതിനാല്‍ ആ പ്രതീക്ഷകള്‍ സാക്ഷാത്ക്കരിക്കാനാവുമെന്ന ശുഭാപ്തി വിശ്വാസം എനിക്കുണ്ട്. മണ്ഡലത്തിലെ ചില ജനകീയ പ്രശ്‌നങ്ങളില്‍ ഇടപെടാന്‍ കഴിഞ്ഞതിന്റെ ചാരിതാര്‍ത്ഥ്യവും പങ്കിടുന്നു.
കൂടുതല്‍ ഫലപ്രദമായി മണ്ഡലത്തിലെ ദൈനം ദിന പ്രവര്‍ത്തനങ്ങള്‍ ഏകോപിപ്പിക്കാന്‍ എം എല്‍ എ ഓഫീസ് പ്രവര്‍ത്തിക്കുന്ന വിവരം ഇതിനോടകം അറിഞ്ഞിട്ടുണ്ടാവുമല്ലോ. വടകരയുടെ പ്രിയപ്പെട്ട എം.പി. കെ.മുരളിധരനാണ് ഓഫീസ് ഉദ്ഘാടനം ചെയ്തത്.
മത / സാമുദായിക / രാഷ്ട്രീയ ഭേദമില്ലാതെ എവര്‍ക്കും എപ്പോഴും ഓഫീസിലേക്ക് സുസ്വാഗതം.
വിവിധ ആവശ്യങ്ങള്‍ക്ക് ഓഫീസില്‍ ബന്ധപ്പെടാനുള്ള ഔദ്യോഗിക നമ്പറുകള്‍ പരിചയപ്പെടാം.
+914962512020 ഇതാണ് വടകരയിലെ എം.എല്‍.എ ഓഫീസ് നമ്പര്‍.
+919447933040 ഇത് എം.എല്‍.എയുടെ ഔദ്യോഗിക നമ്പറാണ്.
ഇത് കേള്‍ക്കുന്ന ചിലര്‍ക്കെങ്കിലും ഈ നമ്പര്‍ ഓര്‍മ്മയുണ്ടാവാം. സഖാവ് ടി.പി. ചന്ദ്രശേഖരന്‍ അവസാന നാള്‍ വരെ ഉപയോഗിച്ചിരുന്ന നമ്പറാണിത്.
ഈ നമ്പര്‍വീണ്ടും ആക്ടീവാവുകയാണ്. ദേശീയ തലത്തില്‍ തന്നെ സജീവ സമര സംഘടനാ പ്രവര്‍ത്തനമുണ്ടായിരുന്ന വിദ്യാര്‍ത്ഥി ജീവിതത്തിന് ശേഷം ടി.പി. യുടെ ജീവിത സഖാവായി , പ്രാദേശികമായ രാഷ്ട്രീയ പ്രവര്‍ത്തനങ്ങളും മഹിളാ സംഘടനവുമൊക്കെയായി കഴിഞ്ഞിരുന്ന ഞാന്‍ വീണ്ടും പൊതു രംഗത്ത് സജീവമായതിന്റെ പശ്ചാത്തലം നിങ്ങള്‍ക്കറിയാമല്ലോ ! സ ടി.പി വീണു പോയിടത്തു നിന്ന് , മുന്നോട്ട്‌പോവുകയാണ് നമ്മള്‍ . 2012 മെയ് 4 വരെ പല തരം പൊതു ആവശ്യങ്ങള്‍ക്ക് ജനങ്ങള്‍ നിരന്തരം വിളിച്ചിരുന്ന , സ. ടി.പി ജനതയെ കേട്ട ആ നമ്പറില്‍ നമുക്ക് പരസ്പരം കേള്‍ക്കാം..
കെ.കെ രമ
