ഭരണഘടന സ്ഥാപനങ്ങള് ലക്ഷ്മണരേഖ ലംഘിക്കരുതെന്ന് സുപ്രിംകോടതി ചീഫ് ജസ്റ്റിസ് എന് വി രമണ. കോടതി വിധികള് സര്ക്കാരുകള് നടപ്പാക്കാത്തത് ജനാധിപത്യത്തിന് നന്നല്ല. ഭരണ നിര്വഹണം കൃത്യമാണെങ്കില് കോടതി ഇടപെടില്ലെന്നും ചീഫ് ജസ്റ്റിസ് രമണ പറഞ്ഞു. പ്രധാനമന്ത്രി നരേന്ദ്രമോദിയും സംസ്ഥാനങ്ങളിലെ മുഖ്യമന്ത്രിമാരുമുള്ള വേദിയിലാണ് സര്ക്കാരുകളെ ചീഫ് ജസ്റ്റിസ് വിമര്ശിച്ചത്.
സര്ക്കാര് സംവിധാനങ്ങള് നല്ലനിലയില് പ്രവര്ത്തിച്ചാല് ജനങ്ങള് കോടതിയിലേക്കെത്തില്ല. പൊലീസിന്റെ അന്യായമായ അറസ്റ്റും പീഡനവും ഒഴിവാക്കിയാല് തന്നെ കോടതിയുടെ ഭാരം കുറയുമെന്നും അദ്ദേഹം പറഞ്ഞു. നിയമ നിര്മാണ സഭകളില് നിയമങ്ങള് പാസാക്കുമ്പോള് വിശദമായ ചര്ച്ചകള് നടത്തണം. നിയമ നിര്മാണത്തിലെ അവ്യക്തകള് കോടതികളുടെ ഭാരം കൂട്ടുന്നുണ്ട്.
ഉത്തരവ് നടപ്പാക്കാത്തതു കൊണ്ട് അതീവ ഗുരുതരമായ സാഹചര്യം സൃഷ്ടിക്കുന്നുണ്ടെന്നും ചീഫ് ജസ്റ്റിസ് പറഞ്ഞു. ഉദ്യോഗസ്ഥ സംവിധാനത്തിന്റെ കെടുകാര്യസ്ഥതയും, നിയമങ്ങളിലെ വ്യക്തതക്കുറവും കേസുകള് കെട്ടിക്കിടക്കുന്നതിന് പ്രധാന കാരണമാണെന്ന് ചീഫ് ജസ്റ്റിസ് വിമര്ശിച്ചു. ജനാധിപത്യത്തിലെ ഓരോ തൂണിനും നല്കിയിട്ടുള്ള അധികാരങ്ങളുടെ ലക്ഷ്മണ രേഖയെ കുറിച്ച് ജഡ്ജിമാരെ ഓര്മിപ്പിച്ചു.
അതേസമയം, ജനങ്ങള്ക്ക് ജുഡിഷ്യറിയോടുള്ള വിശ്വാസം വര്ധിപ്പിക്കാന് കോടതികളില് പ്രാദേശിക ഭാഷകള് പ്രോത്സാഹിപ്പിക്കണമെന്ന് പ്രധാനമന്ത്രി നരേന്ദ്രമോദി പറഞ്ഞു. മുഖ്യമന്ത്രിമാരുടെയും, ഹൈക്കോടതി ചീഫ് ജസ്റ്റിസുമാരുടെയും സംയുക്ത സമ്മേളനത്തില് സംസാരിക്കുകയായിരുന്നു ഇരുവരും.
ആറ് വര്ഷത്തെ ഇടവേളയ്ക്ക് ശേഷമാണ് മുഖ്യമന്ത്രിമാരുടെയും, ഹൈക്കോടതി ചീഫ് ജസ്റ്റിസുമാരുടെയും സംയുക്ത സമ്മേളനം സംഘടിപ്പിച്ചത്. ജുഡിഷ്യറിയിലെ ഒഴിവുകള്, നിയമന ശുപാര്ശകളില് അതിവേഗ നടപടി സ്വീകരിക്കണമെന്ന ആവശ്യം, കൊവിഡ് സാഹചര്യത്തില് ആരംഭിച്ച ഓണ്ലൈന് സംവിധാനങ്ങളുടെ ശക്തിപ്പെടുത്തല്, ഐ.ടി അടിസ്ഥാന സൗകര്യ വികസനം തുടങ്ങിയവ സമ്മേളനത്തില് ചര്ച്ചയായി.