ന്യൂഡല്‍ഹി: അരവിന്ദ് കെജ്രിവാളിന്റെ ജീവന് ഭീഷണി. ഡല്‍ഹി മന്ത്രി സൗരഭ് ഭരദ്വാജ് ആണ് ആരോപണവുമായിരംഗത്ത് വന്നത്. കെജ്രിവാളിനെതിരെ തെളിവുകള്‍ ഹാജരാക്കാന്‍ ഇ ഡിക്ക് ആയിട്ടില്ലെന്നും കേന്ദ്രസര്‍ക്കാര്‍ എല്ലാ അതിര്‍ വരമ്പുകളും ലംഘിക്കുന്നുവെന്നും സൗരഭ് ഭരദ്വാജ് കുറ്റപ്പെടുത്തി. അറസ്റ്റിന് പിന്നില്‍ ബിജെപിയുടെ രാഷ്ട്രീയ ഗൂഢാലോചനയെന്നും കെജ്രിവാളിനോട് ചെയ്യുന്നത് അനീതിയാണെന്നും അദ്ദേഹം കുറ്റപ്പെടുത്തി. നടക്കുന്നത് ഒരു രാഷ്ട്രീയ പാര്‍ട്ടിയെ ഇല്ലാതാക്കാനുള്ള നീക്കമാണെന്നും ആം ആദ്മി പാര്‍ട്ടി നിയമനടപടികളുമായി മുന്നോട്ടുപോകുമെന്നും അദ്ദേഹം വ്യക്തമാക്കി.
അരവിന്ദ് കെജ്രിവാളിന്റെ കുടുംബം വീട്ടുതടങ്കലിലെന്ന് ദില്ലി മന്ത്രി ഗോപാല്‍ റായി ആരോപിച്ചു. കുടുംബത്തെ കാണുന്നതില്‍ നിന്ന് തന്നെ തടഞ്ഞുവെന്നും അദ്ദേഹം കുറ്റപ്പെടുത്തി. കുടുംബത്തെ കാണാന്‍ എഎപി നേതാക്കളെ അനുവദിക്കുന്നില്ല. ഏത് നിയമത്തിന്റെ അടിസ്ഥാനത്തിലാണ് ഈ നടപടിയെന്നും എഎപി മന്ത്രി ഗോപാല്‍ റായ് ചോദിച്ചു.
അരവിന്ദ് കെജ്രിവാള്‍ ഒരു മുഖ്യമന്ത്രി മാത്രമല്ല, വലിയ ആശയമാണെന്ന് മന്ത്രി അതിഷി മര്‍ലേന വ്യക്തമാക്കി. ഇസഡ് പ്ലസ് കാറ്റഗറി സുരക്ഷയുള്ള കെജ്രിവാളിന് ഇ ഡി കസ്റ്റഡിയില്‍ ആര് സുരക്ഷയൊരുക്കുമെന്നും അതിഷി ചോദിച്ചു.
