കെപിസിസി പുനഃസംഘടന ഉടന്‍ ഉണ്ടാകില്ലെന്ന് എഐസിസി ജനറല്‍ സെക്രട്ടറി താരിഖ് അന്‍വര്‍. കെ സുധാകരനെ മാറ്റുന്ന കാര്യത്തില്‍ ഇതുവരെ ആലോചന ഇല്ല. കെ സുധാകരനെ മാറ്റുന്ന കാര്യത്തില്‍ തീരുമാനം എടുക്കേണ്ടത് ഹൈക്കമാന്‍ഡ് ആണെന്നും താരീഖ് അന്‍വര്‍ വ്യക്തമാക്കി.
ഭാരത് ജോഡോ യാത്രയ്ക്ക് ശേഷം കോണ്‍ഗ്രസിനെ കൂടുതല്‍ ശക്തിപ്പെടുത്താന്‍ ഉള്ള പദ്ധതികള്‍ക്ക് രൂപം നല്‍കും. നേതാക്കള്‍ ജനങ്ങളുടെ ഇടയിലേക്ക് ഇറങ്ങി പ്രവര്‍ത്തിക്കണമെന്ന് രാഹുല്‍ ഗാന്ധി തന്നെ നിര്‍ദേശിച്ചിട്ടുണ്ട്. അതിനുള്ള പരിപാടികള്‍ ആസൂത്രണം ചെയ്യുമെന്നും എഐസിസി ജനറല്‍ സെക്രട്ടറി പറഞ്ഞു.
കെപിസിസി പുനഃസംഘടന താഴെ തട്ടില്‍ പൂര്‍ണമായി നടപ്പിലാക്കുമെന്ന് കെ മുരളീധരന്‍ എംപി നേരത്തെ പറഞ്ഞിരുന്നു. ഗ്രൂപ്പിന് അതീതമായ പുനഃസംഘടന നടപ്പിലാക്കും. ബൂത്ത് മണ്ഡലം ബ്ലോക്ക് തലം വരെ സമ്പൂര്‍ണ പുനഃസംഘടന നടത്തും. യോഗ്യതയുള്ളവരെ ഭാരവാഹികള്‍ ആക്കണം. എക്സിനെ മാറ്റി വൈയെ വയ്ക്കുമ്പോള്‍ യോഗ്യത മാനദണ്ഡമാക്കണമെന്നും മുരളീധരന്‍ ആവശ്യപ്പെട്ടിരുന്നു.
