കൊച്ചി: മുഖ്യമന്ത്രിയുടെ മകള് വീണ വിജയനെതിരായ മാസപ്പടി ആരോപണം പരിശോധിക്കുമെന്ന് ഗവര്ണര് ആരിഫ് മുഹമ്മദ് ഖാന്. വിഷയത്തില് മുഖ്യമന്ത്രിയോട് വിശദീകരണം തേടുന്നതിനെക്കുറിച്ച് പിന്നീട് തീരുമാനിക്കുമെന്നും അദ്ദേഹം കൊച്ചിയില് മാധ്യമങ്ങളോട് പറഞ്ഞു.
വീണാ വിജയനെതിരായ ആദായനികുതി വകുപ്പിന്റെ കണ്ടെത്തല് ഗൗരവതരമാണ്. മാസപ്പടി വിവാദത്തെക്കുറിച്ചുള്ള ഔദ്യോഗിക രേഖകള് കണ്ടിട്ടില്ല, എന്നാല് പുറത്തുവന്നിരിക്കുന്ന റിപ്പോര്ട്ട് ഗുരുതരമാണെന്ന് മാദ്ധ്യമങ്ങളിലൂടെ മനസിലാക്കുന്നു. വെറും ആരോപണങ്ങളല്ല, ഇന്കംടാക്സിന്റെ കണ്ടെത്തലുകളാണ്. ഇത് അതീവ ഗൗരവത്തോടെയാണ് കാണുന്നതെന്നും ഗവര്ണര് പ്രതികരിച്ചു.
തലസ്ഥാനത്ത് എത്തിയതിന് ശേഷം ഇക്കാര്യം വിശദമായി പഠിച്ച് എന്തു ചെയ്യണമെന്നതിനെക്കുറിച്ച് തീരുമാനിക്കുമെന്നും ഗവര്ണര് അറിയിച്ചു.
മാസപ്പടി വിവാദം കേവലം രണ്ട് കമ്പനികള് തമ്മിലുള്ള സാമ്പത്തിക ഇടപാട് മാത്രമാണെന്ന് വ്യാഖ്യാനിച്ചുകൊണ്ട് പ്രതിരോധിക്കാന് സിപിഎം ശ്രമിക്കുമ്പോഴാണ് ഗവര്ണര് ഇക്കാര്യത്തില് പ്രതികരണവുമായി എത്തിയിരിക്കുന്നത്.
മുഖ്യമന്ത്രിയുടെ മകളെന്ന പരിഗണനയുടെ ഭാഗമായാണ് ഇടപാട് നടന്നതെങ്കില് അത് അധികാര ദുര്വിനിയോഗമാണെന്ന വിലയിരുത്തലിലാണ് ഗവര്ണറുടെ ഓഫീസും എത്തിച്ചേര്ന്നിരിക്കുന്നത്.