ന്യൂയോര്‍ക്കിലെ ഒരു അപ്പാര്‍ട്ട്‌മെന്റ് സമുച്ചയത്തിലുണ്ടായ തീപിടുത്തത്തില്‍ 9 കുട്ടികളടക്കം 19 പേര്‍ കൊല്ലപ്പെട്ടു. 60-ലധികം പേര്‍ക്ക് പരുക്കേറ്റു. ഇവരില്‍ പലരുടെയും നില ഗുരുതരമാണെന്ന് ന്യൂയോര്‍ക്ക് മേയര്‍ അറിയിച്ചു. ബ്രോങ്ക്സിലെ 19 നില കെട്ടിടത്തിലാണ് തീ പടര്‍ന്നത്. രാവിലെ 11 മണിക്ക് രണ്ടാമത്തെയും മൂന്നാമത്തെയും നിലയിലുള്ള തകരാറിലായ സ്‌പേസ് ഹീറ്ററില്‍ നിന്നാണ് തീ പടര്‍ന്നതെന്ന് അധികൃതര്‍ അറിയിച്ചു.
അഞ്ച് ഡസനിലധികം പേര്‍ക്ക് പരിക്കേറ്റതായും 13 പേര്‍ ഇപ്പോഴും ആശുപത്രിയില്‍ ഗുരുതരാവസ്ഥയിലാണെന്നും മേയര്‍ എറിക് ആഡംസിന്റെ മുതിര്‍ന്ന ഉപദേശകനായ സ്റ്റെഫാന്‍ റിംഗല്‍ പറഞ്ഞു. കടുത്ത പുകശ്വസിച്ചാണ് കൂടുതല്‍ പേര്‍ മരിച്ചതെന്ന് എഫ്ഡിഎന്‍വൈ കമ്മീഷണര്‍ ഡാനിയര്‍ നിഗ്രോ അറിയിച്ചു. 200-ഓളം ഫയര്‍ ജീവനക്കാര്‍ എത്തിയാണ് രക്ഷാപ്രവര്‍ത്തനം നടത്തിയത്. രണ്ടാമത്തെയോ മൂന്നാമത്തെയോ നിലയില്‍ നിന്നാണ് തീ പടര്‍ന്നതെന്ന് നിഗ്രോ പറഞ്ഞു. തീപിടുത്തത്തിനുള്ള കാരണം അന്വേഷിക്കുകയാണെന്നും അദ്ദേഹം വ്യക്തമാക്കി.
കെട്ടിടത്തിലെ താമസക്കാരില്‍ പലരും പശ്ചിമാഫ്രിക്കയില്‍ നിന്നുള്ള കുടിയേറ്റക്കാരാണ്. നഗര ചരിത്രത്തിലെ ഏറ്റവും വിനാശകരമായ തീപിടുത്തങ്ങളിലൊന്നാണ് ഇതെന്ന് ഉദ്യോഗസ്ഥര്‍ പറഞ്ഞു.
ഈസ്റ്റ് 181 സ്ട്രീറ്റിലെ തീപിടുത്തത്തെക്കുറിച്ച് വിളിച്ച് മൂന്ന് മിനിറ്റിനുള്ളില്‍ അഗ്‌നിശമന സേനാംഗങ്ങള്‍ എത്തി. 200-ലധികം അഗ്‌നിശമന സേനാംഗങ്ങള്‍ രക്ഷാപ്രവര്‍ത്തനം തുടരുകയാണ്. മരിച്ചവരില്‍ ഒമ്പത് പേരും 16 വയസോ അതില്‍ താഴെയുള്ളവരോ ആണെന്ന് മേയറുടെ ഓഫീസ് അറിയിച്ചു.
