അതിശൈത്യത്തില്‍ വിറങ്ങലിച്ച് ഉത്തരേന്ത്യന്‍ സംസ്ഥാനങ്ങള്‍. യുപി കാന്‍പൂരില്‍ രക്തസമ്മര്‍ദം വര്‍ധിച്ചും രക്തം കട്ടപിടിച്ചും ഒരാഴ്ചക്കിടെ മരിച്ചത് 98 പേര്‍. ഇന്നലെ മാത്രം 14 മരണം റിപ്പോര്‍ട്ട് ചെയ്തു. 1.9 ഡിഗ്രി സെല്‍ഷ്യസാണ് ഡല്‍ഹിയില്‍ ഇന്ന് രേഖപ്പെടുത്തിയ കുറഞ്ഞ താപനില.
യുപി കാണ്‍പൂരില്‍ ഒരാഴ്ചക്കിടെ രക്തസമ്മര്‍ദ്ദം വര്‍ധിച്ചും രക്തം കട്ടപിടിച്ചും 44 പേര്‍ ആശുപത്രിയില്‍ ചികിത്സയിലിരിക്കെയും 54 പേര്‍ ആശുപതിയില്‍ എത്തും മുമ്പെയുമാണ് മരിച്ചത്. 333 പേര്‍ ചികിത്സ തേടി. വിറ്റാമന്‍ ഇ അടങ്ങിയ പഴങ്ങളും പച്ചക്കറികളും കഴിക്കാനും ചെറുചൂടില്‍ പാനീയങ്ങള്‍ കുടിക്കാനും ആരോഗ്യ വിദഗ്ധര്‍ നിര്‍ദേശം നല്‍കി.
ഉത്തരേന്ത്യന്‍ സംസ്ഥാനങ്ങളില്‍ രണ്ട് ദിവസം കൂടി അതി ശൈത്യവും ശക്തമായ മൂടല്‍ മഞ്ഞും തുടരുമെന്നാണ് കാലാവസ്ഥനിരീക്ഷണ കേന്ദ്രത്തിന്റെ മുന്നറിയിപ്പ്. ലഡാക്ക്, ജമ്മു കശ്മീര്‍, ഹിമാചല്‍ എന്നിവിടങ്ങളില്‍ മഴക്ക് സാധ്യതയുണ്ട്. യുപി, പഞ്ചാബ്, ഹരിയാന സംസ്ഥാനങ്ങളിലെ വിദ്യാലയങ്ങള്‍ ശൈത്യകാല അവധി നീട്ടിയിട്ടുണ്ട്.
