തൊടുപുഴ: ഇടമലക്കുടി ട്രൈബല്‍ യു പി സ്‌കൂളിലെ കുട്ടികളും ഇനി ആധൂനിക നിലവാരത്തില്‍ പഠിക്കും. കൊച്ചിന് ഷിപ്പ് യാഡിന്റെ സി എസ് ആര്‍ ഫണ്ടുപയോഗിച്ച് നിര്‍മ്മിച്ച പുതിയ കെട്ടിടത്തിന്റ ഉദ്ഘാടനം അഡ്വ. ഡീന്‍ കുര്യാക്കോസ് എം.പി നിര്‍വഹിച്ചു.
കേരളത്തിലെ ഏക ഗോത്രവര്‍ഗ്ഗ ഗ്രാമപഞ്ചായത്തായ ഇടമലക്കുടിയിലെ എല്‍ പി സ്‌കൂള്‍ ഈ അധ്യയന വര്‍ഷമാണ് അപ്പര്‍ പ്രൈമറി സ്‌കൂളായി സര്‍ക്കാര്‍ ഉയര്‍ത്തിയത്. പുതിയ സ്‌കൂള്‍ കെട്ടിടത്തില്‍ ആവശ്യമെങ്കില്‍ ഹാള്‍ ആക്കി ഉപയോഗിക്കാവുന്ന തരത്തിലുള്ള അഞ്ച് ക്ലാസ്സ് മുറികള്‍, ഡൈനിങ് ഹാള്‍, കിച്ചണ്‍, വാഷ് ഏരിയ , കുട്ടികള്‍ക്കുള്ള പ്രത്യേക വാഷ് ഏരിയ, ആണ്‍കുട്ടികള്‍ക്കും പെണ്‍കുട്ടികള്‍ക്കും പ്രത്യേക ശുചിമുറികള്‍ എന്നിവ കൂടാതെ ഡൈനിങ് ടേബിളുകള്‍, കസേരകള്‍, ക്ലാസ് മുറികളില്‍ വൈദ്യുതീകരണം എന്നിവയെല്ലാം ഇതോടൊപ്പം സജ്ജീകരിച്ചിട്ടുണ്ട്. 4151 സ്‌ക്വയര്‍ ഫിറ്റാണ് ആകെ കെട്ടിട വിസ്തീര്‍ണ്ണം. പ്രതികൂല സാഹചര്യങ്ങളും കാലാവസ്ഥയും മറികടന്ന് 66 ലക്ഷം രൂപ ചെലവില്‍ ജില്ലാ നിര്‍മ്മിതി കേന്ദ്രമാണ് നിര്‍മ്മാണം പൂര്‍ത്തീകരിച്ചത്. നിര്‍മ്മാണ സാമഗ്രികള്‍ സൈറ്റില്‍ എത്തിക്കുകയെന്നത് കരാറുകാര്‍ക്ക് പ്രധാന വെല്ലുവിളിയായിരുന്നു.
2019 ല്‍ ഡീന്‍ കുര്യാക്കോസ് എം.പിയായി ചുമതലയേറ്റെടുത്തപ്പോള്‍ ഇടമലക്കുടി പഞ്ചായത്ത് പ്രതിനിധികളും അവിടുത്തെ ഗോത്രവര്‍ഗ്ഗ വിഭാഗവും ആദ്യമായി ആവശ്യപ്പെട്ട കാര്യമാണ് സ്‌ക്കൂളിന് മികച്ച രീതിയിലുള്ള ക്ലാസ്സ് മുറികളുള്‍പ്പെടെ നല്ലൊരു കെട്ടിടവും മൊബൈല്‍ ഫോണ്‍ 4ജി സൗകര്യവും. കെട്ടിടം എം.പി. ഫണ്ടില്‍ ഉള്‍പ്പെടുത്തി നല്‍കാന്‍ നടപടികളുമായി മുന്നോട്ടു പോയപ്പോഴാണ് കോവിഡ് മഹാമാരി വന്നതും കേന്ദ്രസര്‍ക്കാര്‍ എം.പി. ഫണ്ട് 2 വര്‍ഷത്തേക്ക് നിര്‍ത്തലാക്കിയതും. തുടര്‍ന്ന് വിവിധ കമ്പനികളെ സി.എസ്.ആര്‍ ഫണ്ടിനായി സമീപച്ചത്. അവസാനം കൊച്ചിന് ഷിപ്പ് യാര്‍ഡ് ആവശ്യം അംഗീകരിക്കുകയും 66 ലക്ഷം രൂപ അനുവദിച്ച് സ്‌ക്കൂള്‍ കെട്ടിടം എന്ന ലക്ഷ്യം പൂര്‍ത്തീകരിച്ചതെന്നും എം.പി. പറഞ്ഞു.
ഈ അവസരത്തില്‍ കൊച്ചിന് ഷിപ്പ് യാര്‍ഡ് ചെയര്‍മാനും മാനേജിങ്ങ് ഡയറക്ടറുമായ മധു എസ് നായര്‍, ഇന്‍ഡിപ്പെന്റ് ഡയറകടര്‍ അമ്രപാലി പ്രശാന്ത് സല്വെ, സി.എസ്. ആര്‍ ഹെഡ് സമ്പത്ത് കുമാര്‍ പിഎന്‍, ഷിപ്പ് യാര്‍ഡ് മാനേജര്‍ എ.കെ. യൂസഫ് എന്നിവര്‍ക്ക് പ്രത്യേകം നന്ദി അറിയിക്കുന്നതായി എം.പി. പറഞ്ഞു. ആവശ്യമെങ്കില്‍ തുടര്‍ന്നും ഇടമലക്കുടിയിലേക്ക് കൊച്ചിന് ഷിപ്പ് യാര്‍ഡിന്റെ സഹകരണം ഉറപ്പാക്കുമെന്നും അമ്രപാലി പ്രശാന്ത് സല്വെ അറിയിച്ചു.
ജില്ലാ കളക്ടര്‍ ഷീബ ജോര്‍ജ്ജ് , കൊച്ചിന് ഷിപ്പ് യാര്‍ഡ് ലിമിറ്റഡ് പ്രതിനിധി അമ്രപാലി പ്രശാന്ത് സല്വെ, സബ് കലക്ടര്‍മാരായ അരുണ്‍ എസ് നായര്‍ , ജയകൃഷ്ണന്‍ വിഎം, നിര്‍മ്മിതി കേന്ദ്രം പ്രോജക്ട് എഞ്ചിനീയര്‍ ബിജു. എം., ത്രിതല പഞ്ചായത്ത് പ്രതിനിധികള്‍, ട്രൈബല്‍ ഡവലപ്പ്‌മെന്റ് ഓഫീസര്‍ നജീം എസ്.എ. സ്‌ക്കൂള്‍ ഹെഡ് മാസ്റ്റ്ര്‍ ജോസഫ് ഷാജി അരൂജ എന്നിവര്‍ ചടങ്ങില്‍ പങ്കെടുത്തു.
മൊബൈല്‍ 4 ജി സൗകര്യം ലഭ്യമാക്കുന്നതിനായി കേന്ദ്രസര്‍ക്കാരിന്റെ യുഎസ്.ഒ. ഫണ്ടില്‍ നിന്നും തുക അനുവദിച്ച് 5 മൊബൈല്‍ ടവറുകള്‍ അനുവദിച്ച് നിര്‍മ്മാണം നടന്നുവരുന്നു. ഈ ജനുവരി മുതല്‍ ഇടമലക്കുടിയില്‍ മൊബൈല്‍ റേഞ്ച് ലഭ്യമായി തുടങ്ങിയിട്ടുണ്ടെന്നും എം.പി. പറഞ്ഞു.
