മോന്സണ് മാവുങ്കലിനെതിരെയുളള കേസുകള് അന്വേഷിക്കാന് ക്രൈംബ്രാഞ്ച് തിരുവനന്തപുരം റേഞ്ച് ഐ.ജി സ്പര്ജന്കുമാറിന്റെ നേതൃത്വത്തില് രൂപീകരിച്ച പ്രത്യേക അന്വേഷണ സംഘം വിപുലീകരിച്ചു.
ഇന്സ്പെക്ടര്മാരുള്പ്പെടെ പത്ത് ഉദ്യോഗസ്ഥരെ ഉള്പ്പെടുത്തിയാണ് അന്വേഷണ സംഘം വിപുലീകരിച്ചത്. മുനമ്പം സ്റ്റേഷന് ഹൗസ് ഓഫീസര് എ.എല്. യേശുദാസ്, കൊച്ചിസിറ്റി സൈബര് സ്റ്റേഷന് ഹൗസ് ഓഫീസര് അരുണ്. കെ.എസ്, പളളുരുത്തി സ്റ്റേഷന് ഹൗസ് ഓഫീസര് സില്വെസ്റ്റര്. കെ.എക്സ്, എറണാകുളം ടൗണ് സൗത്ത് സ്റ്റേഷന് ഹൗസ് ഓഫീസര് എം.എസ്. ഫൈസല്, പുത്തന്കുരിശ് പോലീസ് സ്റ്റേഷന് എസ്.ഐ സനീഷ്. എസ്.ആര്, മുളവുകാട് പോലീസ് സ്റ്റേഷനിലെ എ.എസ്.ഐ വര്ഗീസ്, കൊച്ചി സെന്ട്രല് പോലീസ് സ്റ്റേഷനിലെ എ.എസ്.ഐ റെജി. ടി.കെ, ഫോര്ട്ട്കൊച്ചി പോലീസ് സ്റ്റേഷനിലെ സീനിയര് സിവില് പോലീസ് ഓഫീസര് സജീവന്, കൊച്ചി സിറ്റി സൈബര് പോലീസ് സ്റ്റേഷനിലെ സീനിയര് സിവില് പോലീസ് ഓഫീസര് ഷിഹാബ്, കൊച്ചി സിറ്റി ഡി.എച്ച്.ക്യുവിലെ സിവില് പോലീസ് ഓഫീസര് മാത്യു എന്നിവരെയാണ് പുതുതായി അന്വേഷണ സംഘത്തില് ഉള്പ്പെടുത്തിയത്.
അതേസമയം, വ്യാജ പുരാവസ്തു തട്ടിപ്പ് കേസുമായി ബന്ധപ്പെട്ട് അറസ്റ്റിലായ മോന്സന്റെ കലൂരിലെ വീട്ടിലെ സിസിടിവി ദൃശ്യങ്ങള് ശേഖരിക്കാന് ഒരുങ്ങുകയാണ് അന്വേഷണ സംഘം. പൊലീസ് ഉന്നത തല ബന്ധം അടക്കം പുറത്ത് വരുന്ന സാഹചര്യത്തില് മോണ്സനെ കാണാന് ആരൊക്കെ വന്നു എന്നതുള്പ്പെടെ സിസിടിവി ദൃശ്യങ്ങള് പരിശോധിക്കുന്നതിലൂടെ ലഭിക്കുമെന്നാണ് സംഘത്തിന്റെ വിലയിരുത്തല്.
പുതിയ അന്വേഷണ സംഘമാണ് സിസിടിവി ദൃശ്യങ്ങള് ശേഖരിക്കുക. ഇതിനിടെയാണ് അന്വേഷണത്തില് പുതിയ സംഘത്തോടൊപ്പം കൂടുതല് ഉദ്യോഗസ്ഥരെ ഉള്പ്പെടുത്തിയിരിക്കുന്നത്.
