ഇടുക്കി അണകെട്ട് നാളെ തുറക്കും. ഇന്ന് ഉച്ചയ്ക്ക് രണ്ട് മണിക്ക് മന്ത്രി റോഷി അഗസ്റ്റ്യന്റെ നേതൃത്വത്തില്‍ ഇടുക്കി കളക്ട്രേറ്റില്‍ ചേര്‍ന്ന യോഗത്തിലാണ് തീരുമാനം. ജലനിരപ്പ് അപ്പര്‍ റൂള്‍ ലെവലിലേക്ക് എത്തിയ സാഹചര്യത്തിലാണ് ചെറുതോണി ഡാമിന്റെ ഷട്ടറുകള്‍ നാളെ തുറക്കാന്‍ തീരുമാനമായത്. നാളെ രാവിലെ പത്ത് മണിക്ക് അണക്കെട്ട് തുറക്കുമെന്നാണ് ലഭിക്കുന്ന റിപ്പോര്‍ട്ട്. 50 ക്യുമെക്സ് വെള്ളം ആയിരിക്കും തുറന്ന് വിടുക.
ജലനിരപ്പ് ഉയര്‍ന്നതോടെ ഇന്ന് രാവിലെ ഇടുക്കി ഡാമില്‍ റെഡ് അലര്‍ട്ട് പ്രഖ്യാപിച്ചിരുന്നു. ഇടുക്കി ഡാമിലെ അധിക ജലം സ്പില്‍വേയിലൂടെ ഒഴുക്കി വിടുന്നതിന്റെ ഭാഗമായി എമര്‍ജന്‍സി പ്ലാനിങ് മാനേജര്‍ മുന്നാം ഘട്ട മുന്നറിയിപ്പായിട്ടാണ് രാവിലെ 7.30 മുതല്‍ റെഡ് അലര്‍ട്ട് പ്രഖ്യാപിച്ചത്. പെരിയാറിന്റെ ഇരുകരകളിലുമുള്ളവര്‍ ജാഗ്രത പാലിക്കണമെന്നും അധികൃതര്‍ അറിയിച്ചിട്ടുണ്ട്.
കാഞ്ഞിരപ്പുഴ ഡാമിന്റെ ഷട്ടറുകള്‍ ഇന്ന് 12 മണിക്ക് 70 സെന്റിമീറില്‍ നിന്നും 60 സെന്റിമീറില്‍ ആയി താഴ്ത്തിയിട്ടുണ്ട്. ജലനിരപ്പ് 773 മീറ്റര്‍ എത്തിയ സാഹചര്യത്തില്‍ ബാണാസുര സാഗര്‍ ജലസംഭരണിയിലും ഓറഞ്ച് അലര്‍ട്ട് പ്രഖ്യാപിച്ചിരുന്നു. 774 മീറ്ററാണ് ജലസംരണിയുടെ ഇന്നത്തെ അപ്പര്‍ റൂള്‍ ലെവല്‍.
ഡാമിലെ അധിക ജലം താഴേക്ക് ഒഴിക്കി വിടുന്നതിനുള്ള പ്രാരംഭ നടപടികളുടെ ഭാഗമായുള്ള രണ്ടാംഘട്ട മുന്നറിയിപ്പാണ് ഓറഞ്ച് അലര്‍ട്ട്. പത്ത് സ്പില്‍വേ ഷട്ടറുകള്‍ തുറന്നിട്ടും മുല്ലപ്പെരിയാറില്‍ ജലനിരപ്പ് ഉയര്‍ന്ന് തന്നെയാണ് ഉള്ളത്. പെരിയാര്‍ തീരുത്തും അതീവ ജാഗ്രത തുടരുകയാണ്.
ഞായറാഴ്ച എട്ട് ജില്ലകളില്‍ യെല്ലോ അലര്‍ട്ട് ആണ്. കോട്ടയം, ഇടുക്കി, തൃശ്ശൂര്‍, പാലക്കാട്, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് ഞായറാഴ്ച യെല്ലോ അലര്‍ട്ട്. മത്സ്യത്തൊഴിലാളികള്‍ കടലില്‍ പോകരുത് എന്ന് മുന്നറിയിപ്പുമുണ്ട്.
