ആലുവ: മാലിന്യ നിര്‍മാര്‍ജ്ജനം പഞ്ചായത്തുകളുടെ മാത്രമല്ല ഓരോരുത്തരുടേയും ഉത്തരവാദിത്വമാണെന്നുള്ള കാഴ്ചപ്പാടിലേക്ക് സമൂഹം മാറിയിട്ടുണ്ടെന്ന് വ്യവസായ വകുപ്പ് മന്ത്രി പി. രാജീവ് പറഞ്ഞു. കടുങ്ങല്ലൂര്‍ ഗ്രാമ പഞ്ചായത്തില്‍ ബിനാനിപുരം സുഡ് കെമി ലിമിറ്റഡ് സി.എസ്.ആര്‍ ഫണ്ട് ഉപയോഗിച്ച് ഓഞ്ഞിത്തോട് പാലത്തില്‍ സ്ഥാപിച്ച ഹൈമാസ്റ്റ് ലൈറ്റിന്റെയും നിരീക്ഷണ ക്യാമറകളുടെയും പ്രവര്‍ത്തന ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. ഓഞ്ഞിത്തോട് വീണ്ടെടുക്കാനായുള്ള ശ്രമങ്ങള്‍ നടന്നുകൊണ്ടിരിക്കുകയാണ്. വിശദമായ പ്രൊജക്ട് റിപ്പോര്‍ട്ട് തയ്യാറാകുന്നു. ജല സ്രോതസുകള്‍ സംരക്ഷിക്കേണ്ടത് ഓരോത്തരുടേയും കടമയും ഉത്തരവാദിത്തമാണെന്നും മന്ത്രി പറഞ്ഞു. ഓപ്പറേഷന്‍ വാഹിനിയിലൂടെ കൈത്തോടുകള്‍ വൃത്തിയാക്കിയപ്പോള്‍ മാത്രം വളരെയധികം പ്ലാസ്റ്റിക് മാലിന്യങ്ങളാണ് ലഭിച്ചതെന്നും അതിനാല്‍ ജലസ്രോതസ്സുകളും പുറമ്പോക്കുകളും മലിനമാക്കാതെ സംരക്ഷിക്കണമെന്നും മന്ത്രി പറഞ്ഞു.
മാലിന്യങ്ങള്‍ വീടുകളില്‍ തന്നെ തരംതിരിച്ച് നല്‍കുന്നത് ഏറെ പ്രയോജനം ചെയ്യുമെന്നും തദ്ദേശ സ്വയംഭരണ സ്ഥാപനങ്ങള്‍ വഴി ജനങ്ങള്‍ക്ക് ബോധവല്‍ക്കരണം നല്‍കണമെന്നും മുഖൃപ്രഭാക്ഷണം നടത്തിയ ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ് പറഞ്ഞു. അഞ്ച് ലക്ഷം രൂപയുടെ ലൈറ്റുകളും ക്യാമറകളുമാണ് സി. എസ്.ആര്‍ ഫണ്ടിലൂടെ ബിനാനിപുരം സുഡ് കെമി ലിമിറ്റഡ് കമ്പനി പഞ്ചായത്തിലേക്ക് ലഭ്യമാക്കിയത്. ആറു ക്യാമറകളും ആറു ലൈറ്റുകളുമാണ് ആദ്യ ഘട്ടമായി ഘടിപ്പിച്ചിരിക്കുന്നത്. ശേഷിച്ചവ ഉടനെ ഘടിപ്പിക്കും. കടുങ്ങല്ലൂര്‍ ഗ്രാമപഞ്ചായത്ത് പ്രസിഡന്റ് സുരേഷ് മുട്ടത്തില്‍ അധ്യക്ഷത വഹിച്ച ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് രമ്യാ തോമസ്, ബ്ലോക്ക് സ്റ്റാന്‍ഡിംഗ് കമ്മറ്റി ചെയര്‍മാന്‍മാരായ പി.എ അബൂബക്കര്‍, ട്രീസാ മോളി, ബ്ലോക്ക് മെമ്പര്‍ കെ.ആര്‍ രാമചന്ദ്രന്‍, കടുങ്ങല്ലൂര്‍ ഗ്രാമപഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ഓമന ശിവശങ്കരന്‍, ചെയര്‍മാന്‍ മുഹമ്മദ് അന്‍വര്‍, അംഗങ്ങളായ വി.കെ.ശിവന്‍, ഉഷ ദാസന്‍, ബേബി സരോജം, റമീന അബ്ദുള്‍ ജബ്ബാര്‍, ആര്‍.മീര, ടി.ബി.ജമാല്‍, ആര്‍.ശ്രീ രാജ്, എം.കെ.ബാബു, സുനിതാകുമാരി, സഹകരണ ബാങ്ക് പ്രസിഡന്റുമാരായ വി.എം.ശശി,എ.ജി.സോമാത്മജന്‍,എഡ്‌റാക്ക് പ്രസിഡന്റ് ഡോ.സുന്ദരം വേലായുധന്‍, സുഡ് കെമി ചീഫ് മാനേജര്‍ സജി മാത്യു പങ്കെടുത്തു.
