മുവാറ്റുപുഴ : മുവാറ്റുപുഴ നഗരസഭയുടെ വാർഷികപദ്ധതിക്ക് ജില്ലാ ആസൂത്രണസമിതിയുടെ അംഗീകാരം ലഭിച്ചതായി നഗരസഭാ ചെയർമാൻ പി പി എൽദോസ്അറിയിച്ചു. ജില്ലാ കലക്ടറേറ്റിൽ ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ് , കളക്ടർ എസ്. സുഹാസ് ,ജില്ലാ പ്ലാനിങ് ഓഫീസർ ലിറ്റി മാത്യു എന്നിവരുടെ സാന്നിത്യത്തിൽ നടന്ന ജില്ലാ ആസൂത്രണസമിതി യോഗത്തിലാണ് 67587000 രൂപയുടെ പദ്ധതികൾക്ക് അംഗീകാരം ലഭിച്ചത് .
ജില്ലയിൽ പദ്ധതിക്ക് അംഗീകാരം ലഭിക്കുന്ന ആദ്യ നഗരസഭയായി മുവാറ്റുപുഴ മാറി .പല നഗരസഭകളിലും വികസനസെമിനാറുകൾ പോലും പൂർത്തിയാക്കാൻ കഴിയാത്ത സാഹചര്യത്തിലാണ് മുവാറ്റുപുഴ നഗരസഭാ സമയബന്ധിതമായി പദ്ധതികൾ തയ്യാറാക്കി സമർപ്പിച്ച അംഗീകാരം നേടിയത് 32424000 രൂപയുടെ വികസന ഫണ്ടും 35163000 രൂപയുടെ മെയ്ന്റനൻസ് ഫണ്ടും ഉൾപ്പെടെ 67587000 രൂപയുടെ പദ്ധതികൾക്കാണ് അംഗീകാരം ലഭിച്ചത് . നേരത്തെ വർക്കിങ് ഗ്രൂപ്പുകൾ ചർച്ച ചെയ്ത് സമർപ്പിച്ച പദ്ധതികൾക്ക് വികസനസെമിനാറും കൗൺസിൽ യോഗവും അംഗീകാരം നൽകിയിരുന്നു . നഗരത്തിന്റെ വികസനവും ജനങളുടെ ക്ഷേമവും ഉറപ്പുവരുത്തുന്ന തരത്തിലാണ് പദ്ധതികൾക്ക് രൂപം നൽകിയിരിക്കുന്നത്
പച്ചക്കറി കൃഷി വികസനം ലക്ഷ്യമിട്ട് ഗ്രോ ബാഗ് ,ജൈവ കീടനാശിനി ,പച്ചക്കറിത്തൈ എന്നിവയുടെ വിതരണം നടത്തും. പുരയിട ,ജാതി ,ഇടവിള കൃഷികളുടെ പ്രോത്സാഹനം ,ഫലവൃക്ഷത്തൈ വിതരണം തുടങ്ങിയവ കാർഷിക അനുബന്ധ മേഖലകളിൽ നടപ്പാക്കും. പശു വളർത്തൽ,കറവപ്പശുക്കൾക്ക് കാലിത്തീറ്റ ,ആട് വളർത്തൽ ,മൃഗാശുപത്രികൾക്ക് മരുന്ന് ,കോഴി ,കറവപ്പശുവളർത്തൽ ,അനിമൽ ബർത്ത് കൺട്രോൾ ,എന്നിവ മൃഗസംരക്ഷണ മേഖലയിൽ നടപ്പാക്കും . അഗതി ,ആശ്രയ ,വയോമിത്രം , ദാരിദ്ര്യ ലഘൂകരണ പദ്ധതികൾ ,അംഗനവാടികൾക്ക് സ്ഥലം വാങ്ങൽ, പൊതു ഇടങ്ങളിൽ ശുചിമുറി നിർമാണം ,ഭിന്നശേഷി സ്കോളർഷിപ്, കിടപ്പുരോഗികൾക്ക് ഓക്സിജൻ എന്നിവയ്ക്കും പദ്ധതിയിൽ തുക നീക്കിവച്ചിട്ടുണ്ട് ,പട്ടിക ജാതി -വർഗ വിദ്യാർത്ഥികൾക്ക് പഠനോപകരണ വിതരണം ,പഠനമുറി നിർമാണം എന്നീ പദ്ധതികളും നടപ്പാക്കും .വീടുകളുടെ വയറിംഗ് ,അറ്റകുറ്റപണികൾ, ബിരുദ വിദ്യാർത്ഥികൾക്ക് സ്കോളർഷിപ് എന്നിവയ്ക്കായി തുക നീക്കിവച്ചിട്ടുണ്ട് .
ജീവിതശൈലീ രോഗങ്ങൾക്കുള്ള മരുന്ന് ,പാലിയേറ്റിവ് കെയർ ,ഡയാലിസിസ് യൂണിറ്റ് നടത്തിപ്പ്, ആശുപത്രികൾക്ക് മരുന്ന് എന്നിവയ്ക്കും തുക വകയിരുത്തിയിട്ടുണ്ട് .സ്ഥലവും വീടും ഇല്ലാത്ത നഗരപരിധിയിൽ താമസിക്കുന്ന അർഹരായവർക്ക് വീടും സ്ഥലവും നൽകും .ഉറവിട മാലിന്യ സംസ്കരണ പദ്ധതി ,വിദ്യാർത്ഥികൾക്ക് പ്രഭാത ഭക്ഷണം ,സ്കൂളുകളുടെ അറ്റകുറ്റ പണികൾ ,നഗരസൗന്ദര്യവൽക്കരണം ,നടപ്പാതയുടെ നവീകരണം, വഴിവിളക്ക് സ്ഥാപിക്കൽ തുടങ്ങിയ പദ്ധതികളും നടപ്പാക്കും. വേഗത്തിൽ പദ്ധതികൾ തയ്യാറാക്കുന്നതിന് ശ്രമിച്ച കൗൺസിൽ അംഗങ്ങളെയും നഗരസഭാ ഉദ്യോഗസ്ഥരെയും വർക്കിങ് ഗ്രൂപ്പ് അംഗങ്ങളെയും , ചെയർമാൻ പി പി എൽദോസ് അഭിനന്ദിച്ചു .