കല്‍പറ്റ: ഭാരത് ജോഡോ യാത്രക്ക് ശേഷം ആദ്യമായി കേരളത്തിലെത്തിയ രാഹുല്‍ ഗാന്ധിയുടെ വയനാട് സന്ദര്‍ശനം തുടരുന്നു. മെഡിക്കല്‍ കോളേജിന് സമീപം തൂങ്ങിമരിച്ച നിലയില്‍ കണ്ടെത്തിയ ആദിവാസി യുവാവ് വിശ്വനാഥന്റെ വീട് സന്ദര്‍ശിച്ചു. കല്‍പ്പറ്റ പാറവയലിലുള്ള വീട്ടിലാണ് രാഹുല്‍ഗാന്ധി എത്തിയിരിക്കുന്നത്. വിശ്വനാഥന്റെ ഭാര്യയുമായി രാഹുല്‍ സംസാരിച്ചു. ആശുപത്രിയിലെ സുരക്ഷാ ജീവനക്കാര്‍ മോഷണക്കുറ്റം ആരോപിച്ചതില്‍ മനംനൊന്താണ് വിശ്വനാഥന്‍ ആത്മഹത് ചെയ്തതെന്നാണ് കുടുംബം ആരോപിക്കുന്നത്. തങ്ങള്‍ക്ക് നീതി ലഭണമെന്നും കുടുംബം ആവശ്യപ്പെടുന്നു. ഈ പശ്ചാത്തലത്തില്‍ കൂടിയാണ് രാഹുല്‍ വിശ്വനാഥന്റെ വീട്ടിലെത്തിയിരിക്കുന്നത്.
ടി സിദ്ധിഖ് എംഎല്‍എ, ജനറല്‍ സെക്രട്ടറി കെ സി വേണുഗോപാല്‍ എന്നിവര്‍ക്കൊപ്പമാണ് രാഹുല്‍ വിശ്വനാഥന്റെ വീട്ടിലെത്തിയത്. കുടുംബം പങ്കുവെച്ച ആശങ്ക കെ സി വേണുഗോപാല്‍ രാഹുലിന് വിശദീകരിച്ചുകൊടുത്തു. പിഞ്ചു കുഞ്ഞിനെ മടിയിലിരുത്തിയാണ് കുടുംബം രാഹുലുമായി സംസാരിക്കുന്നത്.
മണിയന്‍കോട് അഞ്ച് വര്‍ഷം മുമ്പ് ഭര്‍ത്താവ് മരിച്ച ജിജി എന്ന യുവതിക്ക് ഡി.സി.സി നിര്‍മിച്ചുനല്‍കുന്ന വീട്ടിലാണ് ആദ്യമായി രാഹുലെത്തിയത്. ആറ് അംഗങ്ങളാണ് ജിജിയുടെ വീട്ടിലുള്ളത്. ഇവരുടെ ഭര്‍ത്താവ് അജ്ഞാത വാഹനമിടിച്ചാണ് മരണപ്പെട്ടത്. 50 വയസില്‍ താഴെയുള്ള വിധവകള്‍ക്കു വേണ്ടിയാണ് ഭവനനിര്‍മാണ പദ്ധതി നടപ്പാക്കുന്നത്. വൈകീട്ടാണ് വീടുകളുടെ താക്കോല്‍ദാനം.
ഇവിടെ നിന്നാണ്, കോഴിക്കോട് മെഡിക്കല്‍ കോളജില്‍ തൂങ്ങിമരിച്ച നിലയില്‍ കണ്ടെത്തിയ ആദിവാസി യുവാവ് വിശ്വനാഥന്റെ വീട്ടില്‍ രാഹുലെത്തിയത്. ശരീരമാകെ മുറിവുകള്‍ ഉണ്ടായിരുന്നെന്നും പോസ്റ്റ്മോര്‍ട്ടത്തിനു മുമ്പ് അനുമതി വാങ്ങിയില്ലെന്നും കുടുംബം പറഞ്ഞു. എട്ടു വര്‍ഷത്തോളം കാത്തിരുന്ന ശേഷമാണ് കുഞ്ഞുണ്ടായതെന്നും കുഞ്ഞിനെ കണ്ട് സന്തോഷത്തിലിരിക്കെ ഒരിക്കലും ആത്മഹത്യ ചെയ്യില്ലെന്നും കുടുംബം പറയുന്നു. സംഭവത്തില്‍ മനുഷ്യാവകാശ കമ്മീഷനും പട്ടികജാതി കമ്മീഷനും കേസെടുത്തിരുന്നു.
24 മണിക്കൂറിനകം റിപ്പോര്‍ട്ട് നല്‍കാന്‍ മെഡിക്കല്‍ കോളജ് സൂപ്രണ്ടിനോടും പൊലീസിനോടും ആവശ്യപ്പെട്ടിട്ടുണ്ട്. വലിയ തിരക്കാണ് രാഹുലിന്റെ സന്ദര്‍ശനത്തോടനുബന്ധിച്ച് പ്രദേശമാകെയുണ്ടായത്. കുടുംബാംഗങ്ങളുടെ കൈപിടിച്ച് ആശ്വാസവാക്കുകള്‍ ചൊരിഞ്ഞ രാഹുല്‍, കേസുമായി ബന്ധപ്പെട്ട് എല്ലാവിധ പിന്തുണയും ഉറപ്പുനല്‍കി.
ഭാര്യയുടെ പ്രസവത്തിനു വേണ്ടിയാണ് യുവാവ് മെഡിക്കല്‍ കോളജിലെത്തിയത്. എന്നാല്‍ ഇവിടെ വച്ച് മോഷണം ആരോപിച്ച് ചിലര്‍ തടഞ്ഞുവയ്ക്കുകയും മര്‍ദിക്കുകയുമായിരുന്നു എന്നാണ് പരാതി. തുടര്‍ന്നാണ് പിറ്റേന്ന് മരിച്ച നിലയില്‍ കാണുന്നത്. മരത്തില്‍ 15 മീറ്റര്‍ ഉയരത്തിലായിരുന്നു തൂങ്ങിയ നിലയില്‍ മൃതദേഹം.
ഇനി കലക്ടറേറ്റിലെ യോഗത്തില്‍ പങ്കെടുക്കുന്ന രാഹുല്‍, കടുവയുടെ ആക്രമണത്തില്‍ ജീവന്‍ നഷ്ടമായ തോമസിന്റെ വീട് ഉച്ചകഴിഞ്ഞ് സന്ദര്‍ശിക്കും. തുടര്‍ന്ന് മീനങ്ങാടിയില്‍ നടക്കുന്ന പൊതുസമ്മേളനത്തില്‍ പങ്കെടുക്കും. ഇന്നല കരിപ്പൂരില്‍ ഇറങ്ങിയ രാഹുല്‍ ഗാന്ധിക്ക് വന്‍ സ്വീകരണമാണ് പ്രവര്‍ത്തകര്‍ നല്‍കിയത്.
