എഴുത്തുകാരന് സിവിക് ചന്ദ്രന്റെ മുന്കൂര് ജാമ്യ ഉത്തരവിലെ വിവാദ പരാമര്ശങ്ങളുടെ പേരില് സ്ഥലം മാറ്റിയ നടപടിക്കെതിരെ മുന് കോഴിക്കോട് പ്രിന്സിപ്പല് സെഷന്സ് ജഡ്ജി എസ്. കൃഷ്ണകുമാര് ഹൈക്കോടതിയില്. ഹൈക്കോടതി അഡ്മിനിസ്ട്രേറ്റിവ് കമ്മിറ്റിക്കാണ് അദ്ദേഹം പരാതി നല്കിയത്.
എസ്. കൃഷ്ണകുമാറിനെ കൊല്ലം ലേബര് കോടതിയിലേക്കാണ് സ്ഥലം മാറ്റിയത്. ഇതിനെതിരെയാണ് പ്രിന്സിപ്പല് സെഷന്സ് ജഡ്ജി എസ്. കൃഷ്ണകുമാര് ഹൈക്കോടതിയെ സമീപിച്ചത്. സ്ഥലം മാറ്റിയ നടപടി ചട്ടവിരുദ്ധമാണെന്നാണ് അദ്ദേഹം പരാതിയില് ഉന്നയിക്കുന്നത്. ജില്ലാ ജഡ്ജിയായി നിയമിതനായി മൂന്നു വര്ഷം പൂര്ത്തിയാകും മുന്പാണ് സ്ഥലം മാറ്റം.
എഴുത്തുകാരന് സിവിക് ചന്ദ്രന്റെ മുന്കൂര് ജാമ്യത്തിനെതിരെ സംസ്ഥാന സര്ക്കാര് നല്കിയ അപ്പീല് ജസ്റ്റിസ് കൗസര് ഇടപഗത്തിന്റെ ബെഞ്ചാണ് പരിഗണിച്ചത്. പരാതിക്കാരിയുടെ വസ്ത്രധാരണം പ്രകോപനപരമെന്ന് അടക്കം വിവാദ പരാമര്ശമുള്ള കോഴിക്കോട് പ്രിന്സിപ്പല് സെഷന്സ് കോടതിയുടെ ജാമ്യ ഉത്തരവ് റദ്ദാക്കണമെന്നായിരുന്നു സര്ക്കാരിന്റെ ആവശ്യം.
പ്രിന്സിപ്പല് സെഷന്സ് ജഡ്ജി എസ്. കൃഷ്ണ കുമാറിന്റെ ഉത്തരവിലെ പരാമര്ശങ്ങള് അപമാനകരമാണ്. സിവിക് ചന്ദ്രന് സമാന കുറ്റങ്ങള് വേറെയും ചെയ്തിട്ടുണ്ട്. സ്ത്രീകളെ അപമാനിക്കുന്നത് സിവിക് ചന്ദ്രന്റെ ശീലമാണ്. സ്ത്രീവിരുദ്ധ പരാമര്ശങ്ങളാണ് സെഷന്സ് കോടതിയുടെ ഉത്തരവിലുള്ളത്. ഇത്തരം പരാമര്ശങ്ങള് ജനങ്ങള്ക്ക് ജുഡിഷ്യറിയിലുള്ള വിശ്വാസം നഷ്ടപ്പെടുത്തും.
ഏത് വസ്ത്രം, എങ്ങനെ ധരിക്കണമെന്നത് വ്യക്തി സ്വാതന്ത്ര്യം എന്ന മൗലികാവകാശവുമായി ബന്ധപ്പെട്ട വിഷയമാണെന്നും സര്ക്കാര് സമര്പ്പിച്ച അപ്പീലില് ചൂണ്ടിക്കാട്ടിയിരുന്നു.
