മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറി സി.എം. രവീന്ദ്രന് കിടത്തി ചികില്‍സ ആവശ്യമുണ്ടോയെന്ന കാര്യത്തില്‍ മെഡിക്കല്‍ ബോര്‍ഡ് തീരുമാനം ഉടനുണ്ടായേക്കും. കടുത്ത തലവേദന, ന്യൂറോപ്രശ്‌നങ്ങള്‍, ശ്വാസംമുട്ട് തുടങ്ങിയ കോവിഡാനന്തര ആരോഗ്യ പ്രശ്‌നങ്ങള്‍ ചൂണ്ടികാണിച്ചാണ് സി.എം. രവീന്ദ്രന് മെഡിക്കല്‍ കോളജിലെത്തിയത്. നിരീക്ഷണത്തില്‍ കഴിയുന്ന രവീന്ദ്രന്റെ പരിശോധനാ റിപ്പോര്‍ട്ടുകള്‍ വിലയിരുത്തിയാകും കിടത്തി ചികില്‍സ ആവശ്യമുണ്ടോയെന്ന കാര്യത്തില്‍ മെഡിക്കല്‍ ബോര്‍ഡ് തീരുമാനത്തിലെത്തുക. അതേസമയം സി.എം.രവീന്ദ്രനെ പിന്തുണച്ച് മന്ത്രി കടകംപള്ളി സുരേന്ദ്രന്‍ രംഗത്തെത്തി.
സി.എം. രവീന്ദ്രന് വിശ്വസ്തനും സംശുദ്ധ ജീവിതത്തിനുടമയെന്നും മന്ത്രി കടകംപള്ളി സുരേന്ദ്രന്‍. അതേസമയം രവീന്ദ്രന്റെ ആശുപത്രിവാസം നാളെ ഇ.ഡിക്കു മുന്നില്‍ ഹാജരാകാതെയിരിക്കാനുള്ള ഒളിച്ചുകളിയെന്നാണ് പ്രതിപക്ഷത്തിന്റെ ആരോപണം. സി.എം. രവീന്ദ്രന്റെ ആശുപത്രിവാസം മുഖ്യമന്ത്രിയുടെ ഗൂഡാലോചനയെന്നായിരുന്നു കെ.സുരേന്ദ്രന്റെ പ്രതികരണം.
കോവിഡും കോവിഡാനന്തര പ്രശ്‌നങ്ങളും കാരണം നേരത്തെ രണ്ടുതവണ സി.എം. രവീന്ദ്രന് ചോദ്യം ചെയ്യലിനായി ഹാജരായിരുന്നില്ല. തുടര്‍ന്നാണ് നാളെ ഹാജരാകാന്‍ ഇ.ഡി നോട്ടിസ് നല്‍കിയത്.
