തൊടുപുഴ: കരളിന് ഗുരുതര രോഗം ബാധിച്ചു ചികിത്സയിലായ ഭര്‍ത്താവിന്റെ ജീവന്‍ നിലനിര്‍ത്താന്‍ കരള്‍ പകുത്തുനല്‍കി പഞ്ചായത്തംഗമായ യുവതി. ഭര്‍ത്താവായ മണക്കാട് ആനിക്കാട് വീട്ടില്‍ അനിലിനാണ്( 48) മണക്കാട് പഞ്ചായത്ത് സ്ഥിരംസമിതി അദ്ധ്യക്ഷ കൂടിയായ ബിജെപി തൊടുപുഴ നിയോജകമണ്ഡലം സെക്രട്ടറി ജീന അനില്‍ (39) കരള്‍ പകുത്തുനല്‍കിയത്.
കൊച്ചി ആസ്റ്റര്‍ മെഡിസിറ്റിയില്‍ ചികിത്സ നേടിയ അനിലിന് കരള്‍ മാറ്റിവയ്ക്കുക മാത്രമേ പോംവഴിയുള്ളൂവെന്ന് ഡോക്ടര്‍മാര്‍ നിര്‍ദേശിച്ചു. തുടര്‍ന്നാണ് തന്റെ കരള്‍ പകുത്തുനല്‍കാന്‍ ജീന മുന്നോട്ടു വരികയായിരുന്നു. ഒരു മാസം മുന്‍പായിരുന്നു ശസ്ത്രക്രിയ 18 മണിക്കൂറോളം നീണ്ടു. ഇരുവരും ഇപ്പോഴും ആശുപത്രിയില്‍ ഡോക്ടര്‍മാരുടെ നിരീക്ഷണത്തിലാണ്.
അനില്‍ സാധാരണ നിലയിലേക്ക് വരുന്നതായി ആശുപത്രി അധികൃതര്‍ പറഞ്ഞു. ജീന ആശുപത്രിക്ക് സമീപം താമസിച്ചാണ് തുടര്‍ചികിത്സ നടത്തുന്നത്. വൈകാതെ തന്നെ ഇരുവര്‍ക്കും സ്വന്തം വീട്ടിലേക്കു മടങ്ങാനാകാം. പതിനൊന്നും എട്ടും വയസ്സുള്ള രണ്ടു മക്കളാണ് ഇരുവര്‍ക്കും
