കൊല്ലം: ചെഗുവേരയുടെ മകള്‍ ഡോ.അലൈഡ ഗുവേരയും കൊച്ചുമകള്‍ എസ്തഫാനിയ ഗുവേരയും കൊല്ലത്ത് ആയുര്‍വേദ ചികിത്സയില്‍. കാല്‍മുട്ടിലെ അസ്ഥി തേയ്മാനത്തിനും ലിഗമെന്റിന്റെ ക്ഷതത്തിനുമാണ് അലൈഡ ചികിത്സ തേടുന്നത്. പേശീ സംബന്ധമായ നീര്‍വീഴ്ചയും ഉദര ശസ്ത്രക്രിയയ്ക്കു ശേഷമുള്ള ശാരീരിക അസ്വസ്ഥതകളുമാണ് എസ്തഫാനിയ നേരിടുന്നത്. സിപിഎം നിയന്ത്രണത്തിലുള്ള കൊല്ലം എന്‍എസ് ആയുര്‍വേദ ആശുപത്രിയിലാണ് ഇന്നലെ വൈകിട്ടാണ് ഇരുവരെയും 10 ദിവസത്തെ കിടത്തിചികിത്സയ്ക്കായി പ്രവേശിപ്പിച്ചത്.
സിപിഎം പൊളിറ്റ് ബ്യൂറോ അംഗം എം.എ.ബേബി, യുവജന കമ്മിഷന്‍ അധ്യക്ഷ ചിന്താ ജെറോം, സിപിഎം ജില്ലാ കമ്മിറ്റി അംഗം എം.വിശ്വനാഥന്‍ എന്നിവര്‍ ഇരുവര്‍ക്കും ഒപ്പമുണ്ടായിരുന്നു. മന്ത്രി കെ.എന്‍.ബാലഗോപാല്‍, സിപിഎം ജില്ലാ സെക്രട്ടറി എസ്.സുദേവന്‍ എന്നിവര്‍ ഇരുവരെയും ആയുര്‍വേദ ആശുപത്രിയില്‍ സന്ദര്‍ശിച്ചു. ആശുപത്രി മെഡിക്കല്‍ സൂപ്രണ്ട് ഡോ.വി.കെ.ശശികുമാറിന്റെ നേതൃത്വത്തില്‍ ഡോ.പി.കെ.മോഹന്‍ലാല്‍, ഡോ.വാസുദേവന്‍ നമ്പൂതിരി, ഡോ.മഞ്ജു പാര്‍വതി, ഡോ.അഭിനാഷ്, ഡോ.അഖില എസ്.രാജ്, ഡോ.ഹംന എ.സലാം, ഡോ.സോണിയ അനു, ഡോ.സജിത് എന്നിവരടങ്ങിയ മെഡിക്കല്‍ സംഘമാണ് ഇരുവരെയും ചികിത്സിക്കുന്നത്.
