സംസ്ഥാനത്തെ ഒന്നാം വര്ഷ ഹയര് സെക്കന്ഡറി പ്രവേശനത്തിനുള്ള ട്രയല് അലോട്ട്മെന്റ് പ്രകാരം തിരുത്തലുകള്ക്കും കൂടുതല് ഓപ്ഷനുകള് വയ്ക്കുന്നതിനുമുള്ള അവസരം ഇന്ന് വൈകീട്ട് അഞ്ച് മണി വരെ. 4,71,039 പേരാണ് പ്രവേശനത്തിനായി അപേക്ഷിച്ചത്. വെള്ളിയാഴ്ച്ച രാവിലെയാണ് ട്രയല് അലോട്ട്മെന്റ് ലിസ്റ്റ് പ്രസിദ്ധീകരിച്ചത്. റിസള്ട്ട് പരിശോധിക്കുന്നതില് തടസ്സം നേരിട്ടുവെങ്കിലും ഉടന് തന്നെ പ്രശ്നം പരിഹരിക്കുകയായിരുന്നു.
അപേക്ഷകരും രക്ഷിതാക്കളും സൈറ്റില് ഒരുമിച്ച് പ്രവേശിച്ചതോടെയാണ് പലയിടങ്ങളിലും തടസ്സം നേരിട്ടത്. സംഭവം ശ്രദ്ധയില്പ്പെട്ടയുടന് http://www.admission.dge.kerala.gov.in പോര്ട്ടലിന് കൂടുതല് സെര്വറുകള് ഒരുക്കി പ്രശ്നം പരിഹരിക്കുകയായിരുന്നു.
‘ട്രയല് റിസള്ട്ട് പരിശോധിക്കുന്നതിനായി ഒരുക്കിയിയിരുന്ന പോര്ട്ടലിന്റെ 4 സെര്വറുകളിലും ഒരേസമയം ഒരു ലക്ഷത്തില് കൂടുതല് പേര് പ്രവേശിച്ചതിനാലാണ് ഇന്നലെ ട്രയല് റിസള്ട്ട് പരിശോധിക്കുന്നതിന് തടസം നേരിട്ടത്. ഡാറ്റാ സെന്റര്,ഐ.റ്റി.മിഷന്, എന്.ഐ.സി അധികൃതര് എന്നിവര് കൂടുതല് സെര്വറുകള് ഒരുക്കി പ്രശ്നം പരിഹരിച്ചിട്ടുണ്ട്. 30/07/2022 ന് രാവിലെ 11.50 മണി വരെ 1,76, 076 പേര് റിസള്ട്ട് പരിശോധിക്കുകയും അതില് 47,395 പേര് അപേക്ഷയില് തിരുത്തലുകള് അല്ലെങ്കില് ഓപ്ഷനുകള് കൂട്ടിചേര്ക്കുകയുമുണ്ടായിട്ടുണ്ട്’.
അപേക്ഷാ സമര്പ്പണ നടപടികള് സംബന്ധിച്ച് വിദ്യാര്ത്ഥികള്ക്കും രക്ഷിതാക്കള്ക്കും ആശങ്ക വേണ്ടെന്ന് പൊതു വിദ്യാഭ്യാസവും തൊഴിലും വകുപ്പ് മന്ത്രി വി ശിവന്കുട്ടി വ്യക്തമാക്കി. ‘പ്രവേശന നടപടികള് സുഗമമായി നടക്കും. മുന്വര്ഷത്തില് നിന്ന് വ്യത്യസ്തമായി ഇത്തവണ ആദ്യം തന്നെ അധിക ബാച്ചിലേക്ക് പ്രവേശനം നടക്കും. അര്ഹതയുള്ള എല്ലാവര്ക്കും പ്രവേശനം ഉറപ്പാണ്’, മന്ത്രി അറിയിച്ചു.