ഇടുക്കി നെടുംകണ്ടത്ത് പൊലീസ് കസ്റ്റഡിയില് നിന്നും രക്ഷപെട്ട പോക്സോ കേസ് പ്രതിയെ പിടികൂടി. വെളുപ്പിന് 2.00 മണിയോടെ ഇയാളുടെ വീടിന് സമീപത്ത് നിന്നും നെടുങ്കണ്ടം പൊലീസ് പ്രതിയെ കസ്റ്റഡിയിലെടുത്തു. നേരത്തെ രണ്ട് തവണ പൊലിസിന്റെ മുന്പില് പെട്ടെങ്കിലും, അതി വേഗത്തില് ഇയാള് ഓടി രക്ഷപെടുകയായിരുന്നു. ഏഴാം ക്ലാസ് വിദ്യാര്ത്ഥിനിയായ മകളെയാണ് ഇയാള് പീഡിപ്പിക്കാന് ശ്രമിച്ചത്.
പ്രതിക്കൊപ്പം പോയ സിവില് പൊലീസ് ഉദ്യോഗസ്ഥരായ ഷാനു എം വാഹിദ്, ഷമീര് കെ ബി എന്നിവരെ ഇന്നലെ സസ്പെന്റ് ചെയ്തിരുന്നു. രണ്ട് പ്രതികളെ കോടതിയില് ഹാജരാക്കാന് കൊണ്ട് പോകുമ്പോള് അഞ്ച് പൊലീസുകാരെങ്കിലും ഉണ്ടാകേണ്ടതാണ്.
നെടുങ്കണ്ടം എസ് എച്ച് ഒ, സംഭവ ദിവസം സ്റ്റേഷന് ചാര്ജ് വഹിച്ചിരുന്ന ഉദ്യോഗസ്ഥന് എന്നിവര് ഗുരുതരമായ കൃത്യവിലാപം കാട്ടിയതായും കണ്ടെത്തിയിട്ടുണ്ട്.
പോക്സോ കേസ് പ്രതികളുടെ ചിത്രം ചോര്ത്തി നല്കിയ സംഭവത്തിലും പൊലീസുകാര്ക്കെതിരെ നടപടിയുണ്ടാകും. ഇരയെ തിരിച്ചറിയുന്ന തരത്തില് ചിത്രങ്ങള് പുറത്ത് വിട്ടതായി അന്വേഷണത്തില് കണ്ടെത്തിയിട്ടുണ്ട്.
