എറണാകുളം റൂറല്‍ ജില്ലയില്‍ വന്‍ കഞ്ചാവ് വേട്ട. രണ്ടിടങ്ങളില്‍ നിന്നായി പോലിസ് പിടികൂടിയത് നൂറ്റി നാല്‍പ്പതു കിലോ കഞ്ചാവ്. കഞ്ചാവ് കടത്തിയ തൊടുപുഴ കാരിക്കോട് ഇടവെട്ടി മറ്റത്തില്‍ വിട്ടില്‍ അന്‍സല്‍ (34), പെരുമ്പടച്ചിറ ചെളിക്കണ്ടത്തില്‍ നിസാര്‍ (37), വെള്ളത്തൂവല്‍ അരീക്കല്‍ ചന്തു (22) എന്നിവരെയും ജില്ലാ പോലിസ് മേധാവി കെ. കാര്‍ത്തിക്കിന്റെ നേതൃത്വത്തില്‍ പിടികൂടി. 105 കിലോ കഞ്ചാവ് അങ്കമാലിയില്‍ നിന്നും, 35 കിലോ കഞ്ചാവ് ആവോലിയിലെ വാടകവീട്ടില്‍ നിന്നുമാണ് പിടികൂടിയത്. കഞ്ചാവ് കടത്തുന്ന സംഘം എസ്.പി.യുടെ നിരീക്ഷണത്തിലായിരുന്നു. രണ്ടു കാറുകളിലായി 50 പാക്കറ്റില്‍ കഞ്ചാവ് കടത്തുന്ന മൂന്ന് അംഗ സംഘത്തെ പിന്തുടര്‍ന്ന് അങ്കമാലിയില്‍ വച്ച് സാഹസികമായി പോലിസ് പിടികൂടുകയായിരുന്നു.
മൊത്ത വിതരണക്കാരായ ഇവര്‍ ഇതിനു മുമ്പും കഞ്ചാവ് കടത്തിയിട്ടുണ്ട്. ഇവരില്‍ നിന്നും ലഭിച്ച വിവരത്തിന്റെ അടിസ്ഥാനത്തില്‍ നടന്ന പരിശോധനയില്‍ നിന്നുമാണ് കല്ലൂര്‍ക്കാട് ആവോലിയിലെ വാടക വീട്ടില്‍ നിന്നും 17 പാക്കറ്റ് കഞ്ചാവ് പിടികൂടിയത്. സംഭവത്തെ കുറിച്ച് അന്വേഷണം ആരംഭിച്ചതായും കൂടുതല്‍ പേര്‍ ഇതിന്റെ പിന്നിലുണ്ടോയെന്ന് പരിശോധിച്ചു വരികയാണെന്നും എസ്.പി കെ. കാര്‍ത്തിക് പറഞ്ഞു.
കഴിഞ്ഞ ദിവസം പെരുമ്പാവൂരില്‍ നിന്ന് 45 എല്‍.എസ്.ഡി സ്റ്റാമ്പുകളുമായി വിദ്യാര്‍ത്ഥിയടക്കം 3 യുവാക്കളെ പിടികൂടിയിരുന്നു. അന്വേഷണ സംഘത്തില്‍ റൂറല്‍ ജില്ലയിലെ ഡാന്‍സാഫ് സ്‌ക്വാഡിനോടോപ്പം നാര്‍ക്കോട്ടിക് ഡി.വൈ.എസ്.പി എം.ആര്‍.മധു ബാബു സി.ഐ. മാരായ സോണി മത്തായി, പീറ്റര്‍ കെ.ജെ., എസ്.ഐ സൂഫി ടി.എം, എ.എസ്.ഐ മാരായ ഷിബു ജോസഫ്, സാജു പോള്‍, ബിജു എം.വി. ജോസഫ് പി.ജെ, സീനിയര്‍ സിവില്‍ പോലിസ് ഓഫീസര്‍മാരായ റോണി അഗസ്റ്റിന്‍, സലിന്‍ കുമാര്‍ കെ.ബി, ജിസ്‌മോന്‍ എം.ജി, ജിമോന്‍ ജോര്‍ജ്, ജെയ്‌മോന്‍ എം.വി.രതീശന്‍, സുബി, അനില്‍ കുമാര്‍ എന്നിവരും ഉണ്ടായിരുന്നു,
