കൊല്ലം: ചടയമംഗലത്ത് യുവതിയെ ഭര്തൃവീട്ടില് മരിച്ച നിലയില് കണ്ടെത്തിയ സംഭവത്തില് ഭര്ത്താവ് അറസ്റ്റില്. ചടയമംഗലം അക്കോണം സ്വദേശി കിഷോര് എന്നറിയപ്പെടുന്ന ഹരി എസ് കൃഷ്ണനാണ് അറസ്റ്റിലായത്. ആത്മഹത്യാ പ്രേരണ കുറ്റം ചുമത്തിയാണ് ഇയാളെ അറസ്റ്റ് ചെയ്തത്.
അടൂര് പഴകുളം സ്വദേശിനി 24 കാരിയായ ലക്ഷ്മി പിള്ളയെയാണ് ഈ മാസം 20ന് മരിച്ച നിലയില് കണ്ടെത്തിയത്. യുവതി മരിച്ചതില് ദുരൂഹതയുണ്ടെന്ന പരാതിയുമായി യുവതിയുടെ ബന്ധുക്കള് രംഗത്തെത്തിയിരുന്നു. വിദേശത്തു നിന്നെത്തിയപ്പോള് ഭാര്യയെ മരിച്ച നിലയില് കണ്ടെന്നാണ് ഭര്ത്താവിന്റെ മൊഴി.
ഒരു വര്ഷം മുന്പായിരുന്നു ലക്ഷ്മിയും കിഷോറും തമ്മിലുള്ള വിവാഹം. കുവൈത്തില് നിന്ന് രാവിലെ വീട്ടിലെത്തിയപ്പോള് ഭാര്യ ലക്ഷ്മിയെ മരിച്ച നിലയില് കണ്ടെന്നാണ് കിഷോറിന്റെ മൊഴി. എന്നാല് ഇതില് ദുരൂഹതയുണ്ടെന്നാണ് ലക്ഷ്മിയുടെ വീട്ടുകാരുടെ ആരോപണം.
വിവാഹ ശേഷം ഒരു മാസം മാത്രമാണ് ഇരുവരും ഒന്നിച്ച് താമസിച്ചത്. സ്ത്രീധനമായി ആവശ്യപ്പെട്ട സ്വര്ണവും പണവും നല്കിയിരുന്നതായി ലക്ഷ്മിയുടെ ബന്ധുക്കള് പറയുന്നു.
