സംസ്ഥാനത്തെ പ്രധാനപ്പെട്ട 9 സര്വകലാശാലകളിലെ വൈസ് ചാന്സിലര്മാരോട് ഗവര്ണര് രാജിവെക്കാന് ആവശ്യപ്പെട്ട വിഷയത്തില് ഇന്ന് നാല് മണിക്ക് ഹൈക്കോടതിയില് പ്രത്യേക സിറ്റിംഗ്. ജസ്റ്റിസ് ദേവന് രാമചന്ദ്രന്റെ ബെഞ്ച് ഹര്ജി പരിഗണിക്കും. വിസിമാര് സമര്പ്പിച്ച ഹര്ജിയാണ് ഹൈക്കോടതി പരിഗണിക്കുന്നത്.
9 വൈസ് ചാന്സലര്മാരോട് രാജിവയ്ക്കാന് ഗവര്ണര് നിര്ദ്ദേശിച്ച അന്ത്യശാസനത്തിന്റെ സമയം രാവിലെ 11.30 ന് അവസാനിച്ചെങ്കിലും ആരും രാജിവച്ചില്ല. മാത്രമല്ല നിയമ നടപടി സ്വീകരിക്കുമെന്ന് 6 വിസി മാര് രാജ്ഭവനെ അറിയിക്കുകയും ചെയ്തു. അസാധാരണ സാഹചര്യം കണക്കിലെടുത്ത് ഹൈക്കോടതി ഇന്ന് വൈകിട്ട് സപെഷ്യല് സിറ്റിംഗ് നടത്തും.
ദീപാവലി പ്രമാണിച്ച് ഇന്ന് കോടതിക്ക് അവധിയാണ്. എന്നാല് വിഷയം ഇന്ന് തന്നെ പരിഗണിക്കാന് ചീഫ് ജസ്റ്റീസ് നിര്ദ്ദേശിക്കുകയായിരുന്നു. ജസ്റ്റീസ് ദേവന് രാമചന്ദ്രന്റെ ബഞ്ച് ഇന്ന് വൈകിട്ട് വിസിമാരുടെ ഹര്ജി പരിഗണിക്കും
കേരളത്തിലെ ഒന്പത് സര്വകലാശാലകളിലെ വിസിമാരുടെ രാജി ആവശ്യപ്പെട്ട് ഗവര്ണര് അന്ത്യശാസനം നല്കിയതിന് പിന്നാലെ സര്ക്കാര്-ഗവര്ണര് പോര് അതിരൂക്ഷമാകുകയാണ്. ഗവര്ണര് കേരളത്തില് സംഘപരിവാറിന് അഴിഞ്ഞാടാന് കളമൊരുക്കരുതെന്ന് മുഖ്യമന്ത്രി വാര്ത്താസമ്മേളനത്തിലൂടെ ആഞ്ഞടിച്ചു. കേരളത്തിലെ ഉന്നതവിദ്യാഭ്യാസ മേഖലയെ തകര്ക്കാനാണ് ഗവര്ണര് ശ്രമിക്കുന്നതെന്നും ഇതിന് പിന്നില് സംഘപരിവാര് അജണ്ടയാണെന്നുമാണ് സര്ക്കാര് നിലപാട്. ക്ഷുദ്രശക്തികള്ക്ക് കൂട്ടുനില്ക്കരുതെന്നും മുഖ്യമന്ത്രി വിമര്ശിച്ചു.
സര്വകലാശാല നിയമങ്ങളില് വി.സിയെ മാറ്റാന് ഗവര്ണര്ക്ക് അധികാരം നല്കിയിട്ടില്ലെന്ന് മുഖ്യമന്ത്രി പറഞ്ഞു. ബില്ലുകളില് ഒപ്പിടില്ലെന്ന പ്രസ്താവന നിയമസഭയോടുള്ള അവഹേളനമാണ്. ഗവര്ണര്ക്ക് സ്വന്തം നിലയില് മന്ത്രിമാരെ പുറത്താക്കാനോ നിയമിക്കാനോ വിവേചന അധികാരം ഇല്ലെന്നും മുഖ്യമന്ത്രി കൂട്ടിച്ചേര്ത്തു.
