തിരുവനന്തപുരം: സിസ്റ്റര് അഭയ കൊല്ലപ്പെട്ട കേസില് പ്രതികള് കുറ്റക്കാരെന്ന് തിരുവനന്തപുരം സിബിഐ പ്രത്യേക കോടതി കണ്ടെത്തി്. കൊലക്കുറ്റം തെളിഞ്ഞതായി കോടതി വ്യക്തമാക്കി. ഫാ. തോമസ് കോട്ടൂരിനെ തിരെയും സിസ്റ്റര് സെഫിക്കെതിരെ യും കൊലപാതകം, തെളിവു നശിപ്പി ക്കല് എന്നീ കുറ്റങ്ങളാണ് ചുമത്തി യിരിക്കുന്നത്. ഫാ. തോമസ് കോട്ടൂര് കൊലനടത്തുകയെന്ന ഉദ്ദേശ്യത്തോടെ അതിക്രമിച്ചു കയറിയെന്നും കോടതി വിലയിരുത്തി. കേസില് പ്രതികള്ക്കുള്ള ശിക്ഷ നാളെ വിധിക്കും. അഭയ മരിച്ച് 28 വര്ഷങ്ങള്ക്കു ശേഷമാണു കേസില് കോടതിയുടെ കണ്ടെത്തല്.
അതെ സമയം മകളുടെ നീതിക്കായി ആഗ്രഹിച്ച അഭയയുടെ മാതാപിതാക്കള് ഐക്കരക്കുന്നേല് തോമസും ലീലാമ്മയും കേസില് കോടതിയുടെ നിര്ണായക വിധി കേള്ക്കാന് ജീവിച്ചിരിപ്പില്ല. കോട്ടയം ബിസിഎം കോളജില് പ്രീഡിഗ്രി രണ്ടാം വര്ഷ വിദ്യാര്ഥിനി ആയിരിക്കെ സിസ്റ്റര് അഭയയെ 1992 മാര്ച്ച് 27നാണു കോട്ടയം പയസ് ടെന്ത് കോണ്വന്റിലെ കിണറ്റില് മരിച്ച നിലയില് കണ്ടെത്തിയത്.
ലോക്കല് പൊലീസും ക്രൈംബ്രാഞ്ചും ആത്മഹത്യയെന്ന നിഗമനത്തിലെത്തി എഴുതിത്തള്ളിയ കേസില് അഭയയുടേതു കൊലപാതകമാണെന്നു കണ്ടെത്തിയതു സിബിഐയാണ്. സാഹചര്യത്തെളിവുകളും ശാസ്ത്രീയ തെളിവുകളും നിര്ണായകമായി.ഫാ.തോമസ് കോട്ടൂര്, സിസ്റ്റര് സെഫി എന്നിവരാണു യഥാക്രമം ഒന്നും മൂന്നും പ്രതികള്. സിബിഐയുടെ കുറ്റപത്രത്തില് രണ്ടാം പ്രതിയായിരുന്ന ഫാ.ജോസ് പൂതൃക്കയിലിനെ വിചാരണ കൂടാതെ കോടതി വിട്ടയച്ചിരുന്നു. കേസ് അന്വേഷണത്തിനിടെ ദുരൂഹ സാഹചര്യത്തില് മരിച്ച നാലാം പ്രതി മുന് എഎസ്ഐ വി.വി.അഗസ്റ്റിനെയും കുറ്റപത്രത്തില്നിന്നു സിബിഐ ഒഴിവാക്കി.
സിബിഐ കേസ് ഏറ്റെടുത്തെങ്കിലും 16 വര്ഷത്തിനു ശേഷമാണു ഫാ.തോമസ് കോട്ടൂര്, ഫാ.ജോസ് പൂതൃക്കയില്, സിസ്റ്റര് സെഫി എന്നിവരെ അറസ്റ്റ് ചെയ്തത്. 2019 ഓഗസ്റ്റ് 26ന് സിബിഐ കോടതിയില് ആരംഭിച്ച വിചാരണ ഈ മാസം 10നു പൂര്ത്തിയായി. 49 പ്രോസിക്യൂഷന് സാക്ഷികളെ വിസ്തരിച്ചു. 8 പേര് കൂറുമാറി. പ്രതിഭാഗത്തുനിന്ന് ഒരു സാക്ഷിയെപ്പോലും വിസ്തരിച്ചില്ല.
