കൊച്ചി: കൊച്ചി കപ്പല്‍ശാലയില്‍ വ്യാജ രേഖകള്‍ ഉപയോഗിച്ച്‌ ജോലി ചെയ്തിരുന്ന അഫ്ഗാന്‍ പൗരന്‍ അറസ്റ്റില്‍. എറണാകുളം സൗത്ത് പോലീസ് നടത്തിയ അന്വേഷണത്തില്‍ ആണ് കോല്‍ക്കത്തയില്‍ വെച്ച് ഈദ് ഗുള്‍ എന്നയാൾ അറസ്റ്റിലായത്.
കഴിഞ്ഞ മൂന്നു വര്‍ഷമായി ഇയാള്‍ കപ്പല്‍ശാലയില്‍ ജോലി ചെയ്യുകയാണ്. ആസാം സ്വദേശി എന്ന പേരില്‍ വ്യാജ രേഖകളുണ്ടാക്കിയാണ് ഇവിടെ ജോലി ചെയ്തത്. ഇത്തരത്തില്‍ ഏതാനും ആളുകള്‍ ജോലി ചെയ്യുന്നതായി സംശയമുണ്ടെന്നു കാണിച്ച് ഷിപ്പ്‌യാര്‍ഡില്‍നിന്നു ലഭിച്ച പരാതിയുടെ അടിസ്ഥാനത്തിലായിരുന്നു അന്വേഷണം.
പോലീസ് വ്യാജരേഖ സംബന്ധിച്ച അന്വേഷണം ആരംഭിച്ചതിന് പിന്നാലെ ഈദ് ഗുള്‍ ജോലി സ്ഥലത്തു നിന്നു മുങ്ങുകയായിരുന്നു. തുടര്‍ന്നു നടത്തിയ അന്വേഷണത്തിലാണ് ഇയാള്‍ കൊൽക്കത്തയിൽ ഉണ്ടെന്ന വിവരം ലഭിച്ചത്. തുടർന്ന് അന്വേഷണ സംഘം കൊൽക്കത്തയിൽ എത്തിയാണ് ഇയാളെ പിടികൂടിയത്. കൊച്ചിയിലെത്തിച്ച പ്രതിയെ റിമാന്‍ഡ് ചെയ്തു. പ്രതിക്ക് ഭീകര ബന്ധമുണ്ടോ എന്ന വിവരം ഉള്‍പ്പടെ അന്വേഷിക്കുന്നുണ്ടെന്നും പോലീസ് പറഞ്ഞു.
