സുബൈര് വധക്കേസില് കൂടുതല് സിസിടിവി ദൃശ്യങ്ങള് പുറത്ത്. പ്രതികള് കാര് ഉപേക്ഷിച്ച് പോകുന്നതിന്റെ ദൃശ്യങ്ങള് പൊലീസിന് ലഭിച്ചു. കഞ്ചിക്കോട്ട് കാര് ഉപേക്ഷിച്ച പ്രതികള് കടന്നത് തോട് മുറിച്ചാണെന്ന് ദൃശ്യങ്ങളില് വ്യക്തമാണ്. കേസില് മൂന്ന് പ്രതികള് പിടിയിലായിരുന്നു. കൃത്യത്തില് നേരിട്ട് പങ്കെടുത്ത രമേശ്, ശരവണന്, അറുമുഖന് എന്നിവരെയാണ് കസബ പോലീസ് കസ്റ്റഡിയിലെടുത്തത്.
പിടിയിലായ രമേശ് വാടകയ്ക്കെടുത്ത കാറിലാണ് സംഭവസ്ഥലത്തുനിന്ന് പ്രതികള് രക്ഷപ്പെട്ടത്. കൃപേഷ് എന്നയാളുടെ ഉടമസ്ഥതയിലുള്ള കാര്, അലിയാറില്നിന്നാണ് രമേശ് വാടകയ്ക്കെടുത്തത്. നേരത്തെ കൊല്ലപ്പെട്ട ആര്.എസ്.എസ്. പ്രവര്ത്തകന് സഞ്ജിത്തിന്റെ കാര് ഉപയോഗിച്ചാണ് പ്രതികള് സുബൈറിനെ ഇടിച്ചുവീഴ്ത്തിയത്. തുടര്ന്ന് സുബൈറിനെ വെട്ടിക്കൊലപ്പെടുത്തിയ ശേഷം രമേശ് വാടകയ്ക്കെടുത്ത കാറില് രക്ഷപ്പെടുകയായിരുന്നു. ഈ കാര് പിന്നീട് കഞ്ചിക്കോട്ട് ഉപേക്ഷിച്ചനിലയില് കണ്ടെത്തുകയായിരുന്നു. കാര് വഴിയില് ഉപേക്ഷിച്ച ശേഷം ദേശീയപാതക്കരികില് കൂടി മൂന്നുപേര് നടന്നുപോകുന്ന ദൃശ്യങ്ങളും പുറത്തു വന്നിരുന്നു.
ഇതിനിടെ പാലക്കാട് കൊല്ലപ്പെട്ട ആര്എസ്എസ് പ്രവര്ത്തകന് ശ്രീനിവാസന്റെ കൊലയാളികള് ആദ്യം കൊല്ലപ്പെട്ട പോപ്പുലര് ഫ്രണ്ട് പ്രവര്ത്തകന് സുബൈറിന്റെ പോസ്റ്റുമോര്ട്ടം സമയത്ത് ആശുപത്രിയില് എത്തിയതിന്റെ തെളിവ് പൊലീസിന് ലഭിച്ചു. ആശുപത്രിയില് നിന്നുള്ള സിസിടിവി ദൃശ്യങ്ങളാണ് പൊലീസിന് ലഭിച്ചത്. 15-ാം തീയതിയാണ് സുബൈര് കൊല്ലപ്പെടുന്നത്. 16 -ാം തീയതി രാവിലെയാണ് പോസ്റ്റ്മോര്ട്ടം നടന്നത്. ഈ സമയത്ത് രാവിലെ ഒമ്പത് മണിയോടെയാണ് പ്രതികള് ആശുപത്രി പരിസരത്ത് ഉണ്ടായിരുന്നത്.
അതേ ദിവസം ഉച്ചക്ക് ഒരു മണിയോടെയാണ് ആര് എസ് എസ് പ്രവര്ത്തകന് ശ്രീനിവാസന്റെ കൊലപാതകം ഉണ്ടായത്. ആശുപത്രിയില് നിന്നാണ് പ്രതികള് ശ്രീനിവാസനെ കൊലപ്പെടുത്താനായി പോയതെന്നാണ് ദൃശ്യങ്ങളില് നിന്നും വ്യക്തമാകുന്നത്.
