സേഫ് ആന്റ് സ്ട്രോങ് നിക്ഷേപത്തട്ടിപ്പ് കേസ് പ്രതി പ്രവീണ്‍ റാണ റിമാന്‍ഡില്‍. ഈ മാസം 27 വരെയാണ് പ്രവീണ്‍ റാണയെ റിമാന്‍ഡ് ചെയ്തത്. 100 കോടിയുടെ തട്ടിപ്പ് നടന്നെന്നാണ് പ്രോസിക്യൂഷന്‍ വാദം. റാണക്ക് എതിരെ തൃശ്ശൂര്‍ ജില്ലയിലാകെ 36 കേസുകളാണ് രജിസ്റ്റര്‍ ചെയ്തത്. 16 കോടിയോളം രൂപ കൈമാറിയെന്ന് പ്രവീണ്‍ റാണ മൊഴി നല്‍കിയതായും പൊലീസ് വ്യക്തമാക്കി. കൂടുതല്‍ പേരെ ചോദ്യം ചെയ്യും. തൃശ്ശൂര്‍ സ്വദേശി ഹണി തോമസിന്റെ പരാതിയിലാണ് റാണയെ അറസ്റ്റ് ചെയ്തത്.
പ്രവീണ്‍ റാണയെ സഹായിച്ച കണ്ണൂര്‍ സ്വദേശി ഷൗക്കത്തിന് നോട്ടീസ് നല്‍കാനാണ് പൊലീസിന്റെ നീക്കം. കൂടുതല്‍ കേസുകള്‍ വരും ദിവസങ്ങളില്‍ രജിസ്റ്റര്‍ ചെയ്യും. വിവിധ സ്ഥാപനങ്ങള്‍ കേന്ദ്രികരിച്ചാണ് തട്ടിപ്പ് നടത്തിയിട്ടുള്ളത്. 11 സ്ഥാപനങ്ങളുടെ കീഴിലാണ് തട്ടിപ്പെന്നാണ് റിമാന്‍ഡ് റിപ്പോര്‍ട്ട്. നിലവില്‍ 36 കേസുകള്‍ പ്രവീണ്‍ റാണയ്ക്കെതിരെ രജിസ്റ്റര്‍ ചെയ്തിട്ടുണ്ടെന്നാണ് റിമാന്‍ഡ് റിപ്പോര്‍ട്ട്.
അതേസമയം സേഫ് ആന്റ് സ്ട്രോങ് എന്ന സ്ഥാപനത്തിന്റെ കണ്ണൂര്‍ ബ്രാഞ്ചിലും നിക്ഷേപ തട്ടിപ്പ് നടത്തിയതായി പരാതി. വ്യാഴാഴ്ച മാത്രം അഞ്ച് പരാതികള്‍ കണ്ണൂര്‍ ടൗണ്‍ പൊലീസിന് ലഭിച്ചു. ഇതോടെ സ്ഥാപനം കൂടുതല്‍ ജില്ലകളില്‍ തട്ടിപ്പ് നടത്തിയെന്ന് വ്യക്തമായി. കണ്ണൂര്‍ കെ വി ആര്‍ ടവറിലെ നാലാമത്തെ നിലയിലാണ് സേഫ് ആന്റ് സ്‌ട്രോംങ് എന്ന സ്ഥാപനം പ്രവര്‍ത്തിക്കുന്നത്.
കഴിഞ്ഞ ദിവസങ്ങളില്‍ സ്ഥാപന ഉടമ പ്രവീണ്‍ റാണ, ബിസിനസ് പങ്കാളിയായ കണ്ണൂര്‍ സ്വദേശി എന്നിവര്‍ക്കായി തൃശ്ശൂര്‍ പൊലീസ് കണ്ണൂരില്‍ തെരച്ചില്‍ നടത്തിയിരുന്നു. കണ്ണൂരിലും കമ്പനി വന്‍ തോതില്‍ നിക്ഷേപം സ്വീകരിച്ചിട്ടുണ്ടെന്നാണ് പൊലീസിന് ലഭിക്കുന്ന വിവരം.
