ഇടുക്കിയില് എസ്എഫ്ഐ പ്രവര്ത്തകന് ധീരജിന്റെ കൊലപാതകത്തില് ഒരാള് കൂടി അറസ്റ്റില്. പറവൂര് പുത്തന്വേലിക്കര സ്വദേശി അലക്സ് റാഫേല് എന്ന വിദ്യാര്ത്ഥിയാണ് അറസ്റ്റിലായത്. ഇടുക്കി കരിമണല് സ്റ്റേഷനില് നിന്നുള്ള പൊലീസ് സംഘം എത്തിയാണ് അറസ്റ്റ് രേഖപ്പെടുത്തിയത്. അലക്സിനെ ഇടുക്കിയിലേക്ക് കൊണ്ടുപോയി. ഇടുക്കി ഗവ. എഞ്ചിനീയറിംഗ് കോളജിലെ മൂന്നാം വര്ഷ ബിടെക് വിദ്യാര്ത്ഥിയും കെഎസ്യു യൂണിറ്റ് ഭാരവാഹിയുമാണ് അലക്സ്.
കൊലപാതകത്തില് അലക്സിനു പങ്കുണ്ടെന്നാണ് വിവരം. നേരിട്ട് പങ്കായിട്ടുണ്ടോ എന്നതില് വ്യക്തതയില്ല. കൊലപാതകത്തിനു പിന്നാലെ അലക്സ് കോളജില് നിന്ന് മുങ്ങി വീട്ടിലേക്ക് പോയിരുന്നു.
ധീരജിന്റെ കൊലപാതകത്തില് പോസ്റ്റ്മോര്ട്ടം നടപടികള് പൂര്ത്തിയായി. ധീരജിന്റെ വലത്ത് നെഞ്ചിലേറ്റ ആഴത്തിലുള്ള ഒറ്റമുറിവാണ് മരണ കാരണമെന്നാണ് ഇന്ക്വസ്റ്റ് റിപ്പോര്ട്ട്. സംഭവത്തിന് പിന്നില് കൂടുതല് പ്രതികളുണ്ടെന്ന നിഗമനത്തിലാണ് പൊലീസ് അന്വേഷണം പുരോഗമിക്കുന്നത്.
പിടിയിലായ യൂത്ത് കോണ്ഗ്രസ് നേതാവ് നിഖില് പൈലിയുടെയും സുഹൃത്ത് ജെറിന് ജോജോയുടെയും അറസ്റ്റ് രേഖപ്പെടുത്തി. കോളജിലെത്തിയത് തെരഞ്ഞെടുപ്പില് മത്സരിക്കുന്ന ബന്ധുവിനെ സഹായിക്കാനാണെന്ന് നിഖില് പൈലി പൊലീസിന് മൊഴി നല്കി. പേനാ കത്തി സ്വയരക്ഷയ്ക്ക് കരുതിയതാണെന്നാണ് മൊഴി.
ധീരജിന്റെ മൃതദേഹം സിപിഐഎം ഇടുക്കി ജില്ലാ കമ്മിറ്റി ഓഫിസിലും ഇടുക്കി ഗവ. എഞ്ചിനീയറിംഗ് കോളജിലും പൊതുദര്ശനത്തിന് വയ്ക്കും. തുടര്ന്ന് വിലാപ യാത്രയായി മൃതദേഹം ജന്മനാടായ കണ്ണൂരിലേക്ക് കൊണ്ടുപോകും. സിപിഐഎം തളിപ്പറമ്പ് ഏരിയാ കമ്മിറ്റി ഓഫിസിലെ പൊതുദര്ശനത്തിന് ശേഷം മൃതദേഹം വീട്ടിലെത്തിക്കും. തളിപ്പറമ്പ് പട്ടപ്പാറിയില് പൊതുശ്മാശനത്തിലാണ് സംസ്കാരം നടക്കുക.
സംഘര്ഷ സാധ്യത കണക്കിലെടുത്ത് കനത്ത സുരക്ഷയാണ് പൊലീസ് ജില്ലയില് ഏര്പ്പെടുത്തിയിരിക്കുന്നത്. തളിപ്പറമ്പ് ടൗണില് ഇന്ന് വൈകിട്ട് നാല് മണി മുതല് ഹര്ത്താല് പ്രഖ്യാപിച്ചിട്ടുണ്ട്.
ഇന്നലെയാണ് ഇടുക്കി പൈനാവ് ഗവണ്മെന്റ് എന്ജിനീയറിംഗ് കോളജ് വിദ്യാര്ത്ഥിയും എസ്എഫ്ഐ പ്രവര്ത്തകനുമായ ധീരജ് രാജേന്ദ്രന് കൊല്ലപ്പെട്ടത്. കണ്ണൂര് സ്വദേശിയാണ്. ക്യാമ്പസിനകത്തെ കെഎസയു- എസ്എഫ്ഐ പ്രവര്ത്തകര് തമ്മിലുള്ള സംഘര്ഷമാണ് കൊലപാതകത്തില് കലാശിച്ചത്.
