യൂട്യൂബ് ചാനലിലൂടെ അശ്ലീല സംഭാഷണങ്ങളും ചിത്രങ്ങളും പ്രചരിപ്പിച്ചെന്ന പരാതിയില് കണ്ണൂര് സ്വദേശിനിയും വിദ്യാര്ത്ഥിനിയുമായ ശ്രീലക്ഷ്മി അറയ്ക്കലിനെതിരേ സൈബര് പൊലീസ് കേസെടുത്തു. ശ്രീലക്ഷ്മി ഒട്ടേറെ യൂട്യൂബ് ചാനലുകളിലൂടെ ലൈംഗിക സംഭാഷണങ്ങള് നടത്തി യുവതലമുറയെ തെറ്റായ ലൈംഗിക രീതികളിലേക്കു നയിച്ച് സമൂഹത്തില് അരാജകത്വമുണ്ടാക്കുന്നുവെന്ന മെന്സ് റൈറ്റ് അസോസിയേഷന് ഭാരവാഹി അഡ്വക്കേറ്റ് നെയ്യാറ്റിന്കര നാഗരാജ് നല്കിയ പരാതിയിലാണ് പൊലീസ് കേസെടുത്തത്.
കേസ് രജിസ്റ്റര് ചെയ്ത് സൈബര് പൊലീസ് എഫ്.ഐ.ആര്. ചീഫ് ജുഡീഷ്യല് മജിസ്ട്രേറ്റ് കോടതിയില് സമര്പ്പിച്ചു. ജാമ്യം ലഭിക്കുന്ന നിസ്സാരവകുപ്പുകള് ചുമത്തിയുള്ള എഫ്.ഐ.ആറാണ് പൊലീസ് കോടതിയില് നല്കിയിട്ടുള്ളത്.
യൂട്യൂബിലൂടെ സ്ത്രീകളെ അപമാനിക്കുന്ന അശ്ലീല വീഡിയോകള് പ്രചരിപ്പിച്ച വിജയ് പി നായര് എന്നയാളെ ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മിയും ശ്രീലക്ഷ്മിയും അടങ്ങുന്ന സംഘം താമസ സ്ഥലത്ത് എത്തി കയ്യേറ്റം ചെയ്തിരുന്നു. ഇതിന് പിന്നാലെ ശ്രീലക്ഷ്മിക്കെതിരെ വലിയ വിമര്ശനവും സൈബര് ആക്രമണവും നടന്നിരുന്നു.