പതിനേഴുകാരിയെ ബലാത്സംഗം ചെയ്തു ഒളിവില് പോയ പ്രതിയുടെ തലയ്ക്ക് 30,000 രൂപ നഷ്ടപരിഹാരം പ്രഖ്യാപിച്ച് മധ്യപ്രദേശിലെ അനുപൂര് ജില്ലാ പൊലീസ്. പെണ്കുട്ടിയെ മയക്കു മരുന്ന് നല്കി പീഡിപ്പിക്കുകയായിരുന്നുവെന്ന് പൊലീസ് പുറത്തിറക്കിയ കുറിപ്പില് പറയുന്നു.
ഡിസംബര് 4ന് ജില്ലാ ആസ്ഥാനത്ത് നിന്ന് 40 കിലോമീറ്റര് അകലെയുള്ള വയലിലാണ് പെണ്കുട്ടിയുടെ മൃതദേഹം കണ്ടെത്തിയത്. അമിത രക്തസ്രാവമാണ് മരണ കാരണം. യശ്വന്ത് മര്വി എന്നയാളാണ് പ്രതി. വെള്ളിയാഴ്ച മുതല് ഇയാള് ഒളിവിലാണ്. പെണ്കുട്ടിയെ കാണാതാകുന്നതിന് മുമ്പ് ഡിസംബര് 3 ന് വൈകുന്നേരം ഇരയ്ക്കൊപ്പം പ്രതിയെ കണ്ടതായി കുടുംബം പറയുന്നു.
പെണ്കുട്ടിക്ക് നീതി നല്കണമെന്നാവശ്യപ്പെട്ട് നാട്ടുകാര് ഞായറാഴ്ച പൊലീസ് സ്റ്റേഷനു മുന്നില് പ്രതിഷേധിച്ചിരുന്നു. ഇതിനു ശേഷമാണ് പൊലീസ് പ്രതിയുടെ തലയ്ക്ക് പാരിതോഷികം പ്രഖ്യാപിച്ചത്. പ്രതിയെ പിടികൂടാനുള്ള ശ്രമങ്ങള് ഊര്ജിതമാക്കിയിട്ടുണ്ടെന്ന് പൊലീസ് പറഞ്ഞു.
പ്രതിയെ കണ്ടെത്തി പിടികൂടാന് പ്രത്യേക സംഘം രൂപീകരിക്കാന് അഡീഷണല് ഡയറക്ടര് ജനറല് ഓഫ് പൊലീസ് (ഷാദോള് റേഞ്ച്) ഡിസി സാഗര് അനുപൂര് പൊലീസിന് നിര്ദേശം നല്കി. പ്രതിയുടെ ഒളിത്താവളങ്ങള് റെയ്ഡ് ചെയ്തിട്ടുണ്ടെന്നും പൊലീസ് കൂട്ടിച്ചേര്ത്തു. പോസ്റ്റ്മോര്ട്ടത്തിന്റെ അടിസ്ഥാനത്തില് ഐപിസി 376-ാം വകുപ്പ് പ്രകാരം ബലാത്സംഗത്തിന് കേസെടുത്തിട്ടുണ്ട്. എന്നാല് പ്രതിക്കെതിരെ കൊലപാതകത്തിന് കേസെടുത്തിട്ടില്ല.
