കൊച്ചി: സൗജന്യ കണ്ണ് പരിശോധന ക്യാമ്പിൽ ചികിത്സ തേടിയെത്തിയ യുവതികളുടെ കണ്ണ് തുറപ്പിക്കാൻ മറ്റൊരാശുപത്രിയെ ആശ്രയിച്ച് സംഘാടകർ. ആലുവ റൂറൽ പൊലിസ് പരിധിയിലെ ഒരു പോലിസ് സ്റ്റേഷനുമായി ചേർന്ന് പ്രമുഖ ആശുപത്രി നടത്തിയ ക്യാമ്പിലാണ് ചികിത്സാ പിഴവുണ്ടായതായി പരാതി ഉയർന്നത്. ക്യാമ്പിലെത്തി ലഭിച്ച മരുന്നുപയോഗിച്ച രണ്ട് സ്ത്രീകൾക്കാണ് കണ്ണ് തുറക്കാൻ പോലും കഴിയാതായത്. സംഭവം പൊലിസിന് മുന്നിലുമെത്തി. ക്യാമ്പ് നടത്തിയ ആശുപത്രി അധികൃതരെ പൊലിസ് വിളിച്ച് വരുത്തി. ചർച്ചയിൽ തീരുമാനമായില്ല. തുടർന്ന് ഇവർ സ്ഥലം പഞ്ചായത്ത് പ്രസിഡന്റിനെ സമീപിക്കുകയായിരുന്നു. സംഭവം വിവാദമായതോടെ ആശുപത്രി അധികൃതർ സ്ഥലത്തെത്തി തുടർ ചികിസക്കായി പണം നൽകി നിയമ നടപടികൾ ഒഴിവാക്കുകയായിരുന്നു. എന്നാൽ ചികിത്സാ പിഴവല്ലന്നും കണ്ണ് ദീനം ഉണ്ടായിരുന്ന ചികിത്സ തേടിയവർക്ക് ഇൻഫെക്ഷന് മരുന്ന് നൽകിയിരുന്നതായും ആശുപത്രി അധിക്യതർ പറഞ്ഞു.
