നടിയെ ആക്രമിച്ച കേസുമായി ബന്ധപ്പെട്ട പുതിയ വെളിപ്പെടുത്തലുകളില് ദിലീപിന്റെയും കൂട്ടുപ്രതികളുടെയും മൊബൈല് ഫോണുകള് പരിശോധനയ്ക്ക് അയക്കുന്നതില് ഹൈക്കോടതി വിധി ഇന്ന്. ഫോണുകള് ഏത് ഫോറന്സിക് ലാബിലേക്ക് പരിശോധനയ്ക്ക് അയക്കണം എന്നത് അടക്കമുള്ള കാര്യങ്ങളില് കോടതി തീരുമാനം പറയും.
ഹൈക്കോടതി നിര്ദ്ദേശം അനുസരിച്ച് ആറ് ഫോണുകള് ദിലീപ് കോടതിക്ക് സമര്പ്പിച്ചിരുന്നു. പട്ടികയിലെ 2,3,4 ഫോണുകളാണ് താരം കൈമാറിയത്. നടന് ഉപയോഗിച്ച മൂന്ന് ഫോണുകള്, സഹോദരന് അനൂപിന്റെ കൈവശമുള്ള രണ്ട് ഫോണുകള്, സുരാജിന്റെ കൈവശമുള്ള ഒരു ഫോണ് എന്നിവയാണ് മുദ്രവെച്ച കവറില് സമര്പ്പിച്ചത്. എന്നാല് പൊലീസ് പറയുന്ന ഒന്നാം നമ്പര് ഫോണ് തന്റെ കൈവശമില്ലെന്നാണ് ദിലീപിന്റെ വാദം.
ഐഫോണ് പണ്ട് ഉപയോഗിച്ചതോ അന്വേഷണ സംഘം പിടിച്ചെടുത്തതോ ആകാമെന്നാണ് ദിലീപിന്റെ വിശദീകരണം. ദിലീപ് അന്വേഷണവുമായി സഹകരിക്കുന്നില്ലെന്ന്് പ്രോസിക്യൂഷന് വ്യക്തമാക്കി. കോടതി ഉത്തരവ് മറയാക്കി തെളിവുകള് നശിപ്പിച്ചുവെന്നും പ്രതികളുടേത് കുറ്റക്കാരാണെന്ന് തെളിയിക്കുന്ന തരത്തിലുള്ള പെരുമാറ്റമാണെന്നും പ്രോസിക്യൂഷന് വാദം കോടതിയില് ഉയര്ത്തിയിരുന്നു.
അതേസമയം അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയ കേസില് ദിലീപിന്റെ മുന്കൂര് ജാമ്യാപേക്ഷ ഹൈക്കോടതി വ്യാഴാഴ്ച പരിഗണിക്കും.
