കൊച്ചി: മോഹന്ലാല് നായകനായി എത്തുന്ന ഏറ്റവും പുതിയ ചിത്രമാണ് ‘ആറാട്ട്’. ചിത്രത്തിൻ്റെ റിലീസ് തിയതി പ്രഖ്യാപിച്ചിരിക്കുകയാണ് സംവിധായകന് ബി. ഉണ്ണിക്കൃഷ്ണന്. ചിത്രം ഒക്ടോബര് 14-ന് തിയറ്ററുകളില് റിലീസ് ചെയ്യുമെന്നാണ് സംവിധായകൻ അറിയിച്ചത്. പുലിമുരുകന് ശേഷം മോഹന്ലാലിന് വേണ്ടി ഉദയകൃഷ്ണ രചന നിര്വഹിക്കുന്ന ആറാട്ട്, ഹിപ്പോ പ്രൈം മോഷൻ പിക്ചർൻ്റെ ബാനറിൽ ആണ് റിലീസ് ചെയ്യുന്നത്. നെയ്യാറ്റിന്കര ഗോപന് എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്.
മാടമ്പി, ഗ്രാന്ഡ് മാസ്റ്റര്, മിസ്റ്റര് ഫ്രോഡ്, വില്ലന് എന്നീ ചിത്രങ്ങള്ക്ക് ശേഷം മോഹന്ലാല് – ബി. ഉണ്ണികൃഷ്ണന് ടീം ഒന്നിക്കുന്ന ആറാട്ടില് ശ്രദ്ധ ശ്രീനാഥ് ആണ് നായികയായെത്തുന്നത്. നെടുമുടി വേണു, സായ്കുമാര്, സിദ്ദിഖ്, വിജയരാഘവന്, ജോണി ആന്റണി, ഇന്ദ്രന്സ്, രാഘവന്, നന്ദു, ബിജു പപ്പന്, ഷീല, സ്വാസിക, മാളവിക, രചന നാരായണന്കുട്ടി തുടങ്ങിയവരാണ് മറ്റു താരങ്ങള്. ക്യാമറ: വിജയ് ഉലകനാഥ്, എഡിറ്റര്: സമീര് മുഹമ്മദ്. സംഗീതം: രാഹുല് രാജ്. കലാസംവിധാനം: ജോസഫ് നെല്ലിക്കല്. വസ്ത്രാലങ്കാരം: സ്റ്റെഫി സേവ്യര്.
